İbrahim Paşa - ابراهیم پاشا

سلطان محمد خان رابع دوری وزراسندن اولوب، دیاربكر بكلربكیسی ایكن، ١۰٩٥ تاریخنده درسعادته جلبله، رتبۀ وزارتله بدون قلعه سی محافظلغنه مأمور اولمش؛ و قره محمد پاشانك شهادتندن صكره، سردارلق كندیسنه توجیه اولنمغله، نمچه عسكرینه قارشی فو فوق العاده جسارت و درایت و حسن تدبیر كوستره رك، بدون اوكنده نمچه نك عساكر وفیره سنی درت آی مشغول ایده رك، تحت محاصره ده اولدیغی حالده، مدون

قلعه سنی محافظه و مدافعه ده امثالی نامسبوق بر غیرت كوسترمش ایسه ده، دشمن مدونك ضبطندن صرف نظرله چكلدكدن صكره، ابراهیم پاشا استرغون قلعه سنی فتح‌ ایتمك اوزره هجوم ایدوب، منهزماً رجعته مجبور اولمش؛ و بو صره ده دشمن اوسك و اروشنی باصوب تخریب ایتمشدر. او وقت ابراهیم پاشا شراىٔط حسنه ایله صلحك ممكن اولوب اوله میه جغنی آكلامق، و ممكن ایسه، باب دولته یازمق اوزره، نمچه عسكرینك باش قوماندانیله مخابره یه كیریشدیكندن، بد خواهلری كندیسنك خفیاً دشمنله مخابره ده اولدیغنی پادشاهه عرض ایتمكله، تفتیش احوالنه كوندریلن عجمزاده حسین افندی دخی بومدعایی تأكید ایدنجه، صوك مغلوبیتی دخی بو مخابرۀ خفیه نك مقتضیاتندن اولمق اوزره، اختیاری بر شی عد اولنه رق، قتلی ایچون فرمان همایون صادر اولمغله، قپوجیلر كتخداسی عبدای زاده محمد آغا كوندریله رك، ١۰٩٦ سنه سی ذی الحجه سنده مشتا اتخاذ ایتدیكی بلغراد شهرنده اعدام ایتمشدر.