İbrahim Paşa - ابراهیم پاشا

(قبا قولاق _) سلطان محمود اول حضرتلری زماننده سكز آی صدارت ایتمشدر. كندیسی قره حصارلی اولوب، درسعادته ورودنده یاقیشیقلیجه و ذكی بر كنج اولمغله، بعض ذواته انتسابدن صكره، كوپریلی زاده شهید مصطفی پاشانك اندرون چوقداری اولمش؛ و مشارالیهك شهادتنده داماد علی پاشایه خزینه كاتبی اولوب، معیتنده ارضرومه كیده رك، بونك دخی وفاتنده استانبوله كلمش؛ و داماد محمد پاشانك توسطیله صدراعظم چورلیلی علی پاشا طرفندن دفعةً باش مقاطعه جیلق رتبه سیله توقیر اولنمش؛ و پایتختجه بعض مأموریتلرده بولندقدن صكره، شهید علی پاشانك صدراتنده میرمیرانلقله بو سنه و الیسی اولمش؛ و بر مدت صكره میر میرانلغی رفعله، ولی نعمت زاده سی نعمات پاشایه كتخدا اولمش؛ و بونك وفاتندن صكره بر آز مدت ازمیرده اقامتله، مؤخراً كوپریلی زاده عبدالله پاشایه وساىٔر بعض وزرایه و صدر اسبق محمد پاشایه كتخدالق ایتمشیدی. محمد پاشانك وفاتندن صكره، سلطان احمد خان ثالث حضرتلرینك سلطنتنه ختام ویرن فتنۀ عظیمه صره سنده استانبوله كله رك، مكر و حیله لرندن غافل بعض ذوات طرفندن، خدمت همایونه شایسته كورلمكله، یكی جلوس ایتمش اولان سلطان محمود اول حضرتلرینه زیاده سیله مدح وثنا اولندیغندن، قپوجیلر كتخدالغنه نصب اولنمش: و او سنه یعنی ١١٤٣ سنه سی رجبنده، سلحدار محمد پاشانك عزلی اوزرینه، مسند صدارته ترفیع اولنمشدر. بو مقامه واصل اولور اولماز، جبلیتنده مركوز اولان غدر و كینه یی اظهارله، عمرنده كندیسنی ولو جزىٔی

ایسه ده، فضیلتی جسارتدن عبارت اولوب، امور دولتدن بیخبر، ساده دل و ناچنته بر آدم اولدیغندن، ادارۀ امور دولته مقتدر اوله مدقدن بشقه، داماد شهریاری علی پاشایی ضیافته دعوتله خانه سنده قتل ایتمكی قورمش اولدیغندن، بو مقصدندن خبردار اولان بعض ذوات علی پاشایه كیفیتی اخطار ایتمكله، دعوته اجابت ایتمه مش، و بو سره واقف بعض ذوات كیفیتی خاكپای شاهانه یه عرض ایتمكله، اندرون همایونه جلب و اعدام اولنمشدر. و فاتنده تخمیناً آلتمش یاشنده ایدی.