İbrahim Paşa Mısırlı zade - ابراهیم پاشا مصرلی زاده

(مصرلی زاده _) سلطان محمد خان رابع و سلطان سلیمان خان ثانی زمانلرنده ایكی دفعه قپودان پاشا اولمشدر. عن اصل طرابلس غرب اوجاغی داییلرندن اولوب، استانبوله كله رك، ترسانه یه یازلمش؛ و بر مدت صكره قالیون قپودانی اولوب، فن ملاحتده كی مهارتی سببیله شهرت بوله رق، ١۰٩٧ تاریخنده، مصاحب مصطفی پاشانك عزلی اوزرینه، قپودان پاشا اولمش، و برنجی اوله رق ترسانه ده سفینه انشاسنه همت ایتمشدر. ایكی سنه قپودانلقده قالدقدن صكره، ١۰٩٩ ده عزل و آغریبوز محافظلغنه نصب اولنمش ایسه ده، سلطان سلیمان خان ثانی دورنده ١١۰١ تاریخنده، دفعۀ ثانیه اوله رق، قپودان پاشا اولوب، ینه ایكی سنه بو مسندی احراز ایتدكدن صكره، یكیدن آغربیوز محافظلغنه اعاده، و مؤخراً آناطولی و الیكنه و ساقز سرعسكرلكنه نصب اولنمش؛ و ساقز و قعه سنده فوق العاده جسارت و مهارت آثاری كوسترمشیدی. سلطان مصطفی خان ثانی دورنده ١١۰٩ تاریخنده آچیلان نچه محاربه سنده شهید اولمشدر.