İbrahim Paşa - ابراهیم پاشا

چلبی سلطان محمد خان حضرتلرینك جلوسلرنده یعنی ٨١٥ تاریخ هجریسنده مسند صدارتی احراز ایده رك، پادشاه مشارالیهك یكتاصدر اعظمی بولنمش، و سلطان مراد ثانی حضرتلری طرفندن دخی ابقا اولنه رق، ٨٣١ تاریخنده واقع اولان وفاتنه دكین مسند آرای صدارت اولمشدر. پدری علی پاشا حضرت خداوندكار ویلدیرم سلطان بایزید زمانلرنده ٢٥ سنه پیایی صدراعظم بولنمش اولدیغی كبی، بیوك پدری خیرالدین پاشا و نام دیكرله چاندرلی قره خلیل دخی

خداوندكار زماننده ١٨ سنه پیایی مسند صدارتی احراز ایتمشیدی. كندیسندن صكره دخی اوغلی خلیل پاشا سلطان مراد ثانی و سلطان محمد ثانی حضرتلری زمانلرنده ٢٦ سنه متمادیاً صدراتی اداره ایتمشدر. بو وجهله مسند صدارت ٨٤ سنه بوسلاله ده بولنمشدر؛ و بونلردن اول شهزاده علاء الدین و سلیمان پاشالر حضراتی صدراعظم بولنمش اولدقلرندن، دولت عثمانیه ده، خاندان حكمرانی یه منسوب اولمیه رق، اك اول مسند صدارته ترفیع اولنانلر بونلردر. جدی قره خلیل مشاهیر علمادن و قضاتدن ایكن، حضرت خداوندكار طرفندن صدارته تعیین ایدلمش اولدیغی كبی، صاحب ترجمه كندیسی دخی زمرۀ مدرسین كرامدن ایكن، یلدیرم سلطان بایزید حضرتلری زمان سلطنتلرنده غزا و سفره دخی كیده رك، سیفی قلمه ترفیق ایتمشیدی. تیمور وقعه سندن صكره، ٨١٤ ده چلبی موسی ادرنه ده امیر سلیمانه غالب كله رك تقرر ایتدیكنده، صاحب ترجمه اركان دولتدن بولنمغله، بیزانس ایمپراطورندن تحصیل ماله مأمور اولوب، بو وظیفه یی بعد الایفا، بروسه یه عزیمتله، چلبی سلطان محمد حضرتلرینه عرض عبودیت ایدنجه، مسند صدارتله اعزاز اولنمش؛ و پادشاه مشارالیهك ارتحالنه دكین صدارت عظمایی كمال درایت و حقانیتله اداره ایتدیكی كبی، سلطان مراد ثانی حضرتلری زماننده دخی یدی سنه صدارت ایتدكدن صكره، ٨٣١ تاریخنده ادرنه ده وفات ایتمشدر. عالم و عاقل و مدبر وعادل بر وزیر ایدی.