İbrahim paşa Damad - ابراهیم پاشا داماد

(داماد_) سلطان مراد‌ ثالث حضرتلرینك رجالندن و فوق العاده منظورولطفدیده لرندن اولوب، سلطان محمد ثالث حضرتلری زماننده اوچ كره صدراعظم اولمشدر. عن اصل بوسنه لی اولوب، حرم همایونده سلحدار شهریاری ایكن، ٩٨٧ تاریخنده یكیچریلر آغالنه، و ٩٨٩ ده روم ایلی میر میرانلغنه تعیین و ٩٩۰ ده رتبۀ وزارتله تبجیل اولنمشیدی. ٩٩١ ده مصر و الیسی اولوب، مصرده بعض اصلاحات اجراسیله برابر، اسایشی تأمین ایتمشدر. اوصره ده بعض اویغونسز حركاتده بولنان درزیلرك‌ تنكیل وتربیه سنه مأمور اولوب، بو ایشه ده موفق اولدقدن صكره، ٩٩٢ ده درسعادته عودت ایتدیكنده، سلطان مراد ثالث حضرتلرینك كریمه سی عایشه سلطانله عقد ازدواج ایده رك، داماد شهریاری اولمغله برابر وزارت ثانیه ایله بكام اولمشدر. ٩٩٥ تاریخنده قلیج علی پاشانك وفاتی اوزرینه، قپودان دریا اولوب، بر سنه قپودانلق ایتمشدر. سلطان محمد ثالثك جلوسنی متعاقب ١۰۰٣ ده قاىٔممقام ركاب همایون اولوب، ١۰۰٤ سنه سی شعباننده صدراعظم اولمش؛ و اكری سفرنده معیت حضرت پادشاهیده بولنه رق، فتح و ظفردن صكره، چغاله زاده سنان پاشا صدراعظم اولمش ایسه ده، قرق كون صكره، یعنی سفر مذكور عودتنده خرمنلی منزلده تكرار مسند صدارته اعاده اولنمشدر. ١۰۰٦ سنه سی ربیع الاولنده، تاتار خاننك ماجراسی اوزرینه، عزل اولنوب، ١۰۰٧ سنه سی ربیع الآخرنده، اوچنجی دفعه اوله رق، صدارته كچمش؛ و سنۀ مزبوره شوالنده سرعسكر-

لك انضمامیله مجارستانه سوق عسكر ایده رك، نو دین جوارنده اردو قورمش، و اوسنه اطراف و اكنافی تأمین و تقویه ایله اكتفا ایدوب، قیشی كچیرمك اوزره، بلغراده عودت ایتمشیدی. ١۰۰٩ ده ینه مجارستانه كچوب (لوفجه) نام قلعه یی و (قانیثره) حصن استوارینی فتح ایله، ینه بلغراده عودت، و ١۰١۰ سنه محرمنده یكیدن سفره حاضرلنمقده ایكن، وفات ایتمشدر. نعشی استانبوله كتیریله رك، شهزاده جامع شریفی، اتصالنده تربۀ مخصوصه سنه دفن اولنمشدر. اوچ دفعه ده اولان مدت صدراتی بش سنه قدردر، عاقل و عادل و مدبر بر وزیر ایدیسه ده، كندیسندن احوال وافعال معتاده سنه بكزمز بعض امور صدور ایتمش، و بعض ایشلرده بیقیدانه حركتی دخی مشهود اولمشدر. اثنای سفرده بر نفره بر باشاق قوپارتمامق و اجرتسز حبۀ واحده آلدیرمامق خصوصنده زیاده دقت و اهتمام ایتدیكی مشهوردر. رقت ومرحمتی بر درجه ده غالب ایدی، كه برینك آغلادیغنی كورسه، درحال كوزلری یاشله طولارمش؛ مع هذا اطوار متضاده سندن اولمق اوزره، كندیسندن بعض خونخوارلقلر دخی ظهور ایتمشدر.