İbrahim Paşa - ابراهیم پاشا

آنف الترجمه ابراهیم پاشانك تورونی و صدراعظم خلیل پاشانك اوغلیدر. سلطان بایزید ثانی حضرتلرینك زمان سلطنتلرنده ٩۰٣ تاریخندن ٩۰٥ تاریخنه دك ایكی سنه مسند صدارتی احراز ایتمشدر. پدری خلیل پاشا استانبولك فتحی صره لرنده صدر اعظم ایكن، خیانتله اتهام اولنه رق، اعدام اولنمغله، كندیسی دخی بالطبع پدرینك نكبتندن حصه مند اوله رق، طریق علمی یه رجوع ایتدیكی حالده، مدرسلكه دخی ناىٔل اوله میوب، بروسه ده یلدیرم بایزید حضرتلرینك اوقافته متولی اولمشیدیسه ده، اورانك قاضیسی عدم استحقاقله اتهام ایده رك، عزل ایتمشیدی. بونك اوزرینه ادبی بر احتساب خدمتنه تنزل ایتدیكی حالده، خصماسی جنوبله كندیسنی اتهام ایده-

رك، بروسه تیمارخانه سنه آتمشلردی. مؤخراً بوبلادن قورتلوب، مشایخ زینیه دن حاجی خلیفه نك اشارت وارشادیله، عتبۀ پادشاهی یه عرضجال تقدیم ایده رك، آماسیه قضاسنی استدعا ایتمش؛ و مستدعاسی قبول اولنه رق، قاضیلقله آماسیه یه كیتمشیدی. اوراده شهزاده سلطان بایزید حضرتلرینك توجه و التفاتنه مظهر اولمش؛ و ٨٨٦ ده شهزادۀ مشارالیه تحت سلطنته جلوس ایدنجه، روم ایلی قاضیعسكرلكیله درسعادته جلب بیورلمشیدی. ٩۰٣ ده هر سك زاده احمد پاشا یرینه مسند صدراته تعیین اولنمش؛ و ٩۰٥ ده اینه بختی سفرینه كیدر كن وفات ایتمشدر. غایتله عالم و فاضل و فقراپرور بر وزیر ایدی. هر كون آلتیوز فقیر مطبخندن اعاشه اولنوردی. وفاتنده سكز بیك آقچه دن بشقه بر شیسی چیقمامشدر. كین و غرضدن بر درجه ده سالم ایدی، كه كندیسنی متولیلكدن عزل ایله نیجه فلاكتلره اوغراتمش اولان بروسه قاضیسی مولانا كرماستی، برای تهنبه، قوناغنه كیتدیكنده، فوق العاده اكرام و التفاته مظهر اولمشیدی. استانبولده اوزون چارشینك آلت باشنده كندی نامیله یاد اولنور بر جامع شریفله اتصالنده بر مدرسه، بر مكتب، وبر چشمه، و سراجخانه قربده بر حمام بنا ایتمشدر. كه الآن موجوددر.