İbrahim Paşa - ابراهیم پاشا

(خواجه_) سلطان احمد خان ثالث زماننده ٢١ كون صدارت ایتمشدر. عن اصل بحر سفید ساحلنده كی (اورله) قصبه سندن اولوب، (پهلوان زاده) دینمكله معروف و جسور بر آدم ایدی. ابتدا خاص بوستانجیلر اوجاغنه دخول ایدوب، واقع اولان بر تهمتی اوزرینه، جزاىٔره فرار ایتمش؛ و بر مدت صكره تكرار استانبوله كله رك، قالیونجیلق وقایقجیلقله كچنمكه باشلامشیدی. سلطان احمد خان حضرتلری تبدیل قیافتله كزدكلری صره ده تصادفاً بر ایكی كره قایغنه بینمكله، حضرت پادشاهه كسب اختصاص ایتمشیدی. قندیه محافظی بولنان قلایلی احمد پاشانك خفیاً مسند صدارته دعوتی ایجاب ایتدیكنده، خط همایونك صاحب ترجمه یدیله ایصالنه ارادۀ پادشاهی تعلق ایتمكله، كندیسی بو خدمتی حسن ایفا ایتدیكندن، مكافاةً اقصای آمالی اولان قالیون قپودانلغنه ناىٔل اولمش؛ و او وقتدن (خواجه ابراهیم) نامیله شهرت بولوب، قپودانلقده كی مهارت و جسارتی حسبیله، آز زمان ایچنده میرمیرانلق رتبه سیله دریا قپودانی اولمشیدی. و قوع بولان بعض محاربات بحریه ده كی موفقیتی اوزرینه، بیوك بر نام قزانه رق، ١١٢٤ سنه سی ربیع الاولنده ادرنه یه دعوتله، دفعةً مسند صدارته ترفیع اولنمش