İbrahim Paşa silahdar - ابراهیم پاشاسلحدار

(سلحدار _ ) سلحدار حسین پاشانك اوغلی اولوب، خزینه كتخداسی ایكن، سلطان احمد خان ثالث حضرتلرینك جلوسندن صكره، ١١١٦ تاریخنده سلحدار حضرت پادشاهی اولمش، و اطوار لاابالیانه سندن طولایی، ینه او سنه عزل اولنمش ایسه ده، متعاقباً وزارتله تبجیل اولنه رق، شهرزور والیلكنه نصب، و ١١٣١ ده ارضروم و الیلكنه نقل اولنمشیدی. او صره ده آچیق بولنان ایران سفرنده قافقاس جهتنه سرعسكر اولوب، تفلیسی بلاحرب ضبط ایتمش ایسه ده، بو موفقیته خدمت ایتمش اولان ایران كبراسندن محمد قلیخان كنجه وروان و دیكر بعض ایالات ایرانیه نك دخی بلاحرب تسلیمنی تعهد ایتمش ایكن، صاحب ترجمه خان مومی الیهه قدر و حیثیتنه كوره حرمت و اعتبار ایتمیوب، تحقیر ایتمش، و تفلیسك اداره سنی قرق بیك غروش مقطوع مقابلنده ظاهرا شرف اسلامله مشرف اولان و ابراهیم تسمیه اولنان و اختانك اوغلی شنوازه اوجاقلق صورتیله‌ احاله ایده رك، كندیسی بحرد مال و ثروت طوپلامغه حصر دقت ایتمش، و تفلیس چارشوسنده بولنان ایران تجاریتی بغیرحق طاغینه رق، ماللرینی یغما ایتدیرمش اولدیغندن؛ وباكونك ضبطی دولتجه زیاده سیله ملتزم، و معیتنده كی عسكر بوكا كافی اولدیغی حالده، كندیسی اختیار رخاوتله روسیه لی یه باكویی ضبطه فرصت ویردیكندن، ١١٣٥ تاریخنده سرعسكرلكدن عزل اولنه رق، یرینه دیاربكر و الیسی وزیر عارفی احمد پاشا نصب اولنمشیدی. عزلی خبرینی آلمازدن كنجه یه هجومله شهری ضبط ایتمش؛ و خلفی شهر مذكوری آنف البیان محمد قلیخانك اداره سنه احاله ایلمشدر. اورادن ارضرومه عودت ایتمش ایسه ده، ارضرومده اردویه ارزاق و مهمات یتیشدیره جك غیور و فعال بر والی بولنمق اقتضا ایتدیكندن، ١١٣٦ ده موصل و الیسی وزیر حاجی مصطفی پاشا ارصروم والیسی اولمش؛ و صاحب ترجمه ایج ایل سنجاغنه كوندرلمشدر. بقیۀ احوالنه دسترس اولنه مدی.