İbrahim Paşa defterdar - ابراهیم پاشا دفتردار

(دفتردار _ ) اون برنجی عصر هجری اواىٔلی رجالندن اولوب، عن اصل بروسه لی اولدیغی حالده، ١۰١٢ ده دمشق شامه كیتمش؛ و اورادن حج شریفه كیده رك، ١۰٢١ ده ینه دمشقه عودتله، دفتر كتخداسی، و ١۰٢٥ ده دفتردار اولمشیدی. شامده توطن ایده رك، ١۰٤١ ده امیر الحج اولمش؛ و عودتنده ینه دفتردارلقده قالمشیدی. مؤخراً دشمنی اولان مراد پاشانك خصومت و نفسانیتیله شام و الیسی كوچك احمد پاشا تفتیش احوالنه مأمور اولوب، ینه مرقوم مراد پاشانك تزویراتیله اختلاسنه حكم اولنه رق، اموالی مصادره، و كندیسی حبس، و ١۰٤٢ ده محبسده خفیاً قتل اولنمشدر. عالم وفاضل بر ذات اولوب، جامع امویده جماعتله و علما ایله مباحثاته دوام ایدردی. فقه و حدیثده دخی ید طولی صاحبی ایدی. شامده بعض اوقاف و حیرات براقمشدر.