Aras ~ آراس
Kamus-ul'Alam - Aras ~ آراس maddesi. Sayfa: 72 - Sira: 8
Aras - آراس
بر ایرماقدر، كه ارضرومك ٤۰ كیلومتره قدر جنوبنده واقع (بیك كول) طاغندن نبعان ایله، شرقه طوغری آقه رق، منبعندن ٨۰ كیلو متره قدر آشاغیده ارضرومك شرق طرفنده كی طاغلردن اینن ( حسن قلعه صویی) نام چای ایله برلشیر. نقطۀ تلاقینك بر آز آلتنده (چوبان كوپریسی ) نامیله یدی كمر اوزرینه غایت كوزل بر طاش كوپری یاپلمشدر. بور الرده (پاسین) اراضیسنی اروا ایتمكله، (پاسین صویی) نامیله معروفدر، كه (اكسنوفون) ك سیاحتنامه سنده (پاسیس) نامیله یاد اولنمسی بوندن مأخوذدر. روسیه حدودینی چكنجه یه قدر عثمانلی طوپراغنده قطع ایتدیكی ١٦۰ كیلومتره لك مسافه ده، ذكر اولنان حسن قلعه صویندن بشقه (قره صو) ونام دیكرله (مورچ) دنیلن چای، وتام خط حدودده دخی قارصك
ایچنده چكن (آرپه چایی) آراسه دوكیلور. آرپه چایی اسكی ارمنی كتابلرنده (آخوریان) نامیله مذكور ایسه ده ، (اكسنوفون) ك سیاحتنامه سنده (آرپاسوس) تسمیه اولنمشدر. كه (آرپه چایی) بوندن مأخود اولسه كركدر، زیرا (اكسنوفون) میلاددن ٤۰۰ سنه اول یازمش اولدیغندن، او وقتده اور الرده تركجه براسمك بولنمسی ملحوظ دكلدر. خرابه لری الیوم موجود اولان (آنی) اسمنده كی اسكی ارمنی شهری بو نهرك كنارنده ایدی. آراس نهری آرپه چاییله بر لشدكدن صكره، شرقه طوغری آقوب، بعده شرق شمالی یه طوغری دونر. آرپه چایندن صكره آراسه صولدن یعنی شمالی ساحلندن دوكیلن نهرلر: (الاكز) طاغنك اتكسندن اینن (غربی) ونام دیكرله (آونان ) و (غوچه) كولنك صولرینی ایندیرن (قارتیچور) ونام دیكرله (آزاد) نهرلریله (نقچوان) و(آلینجه)، وصاغدن یعنی جنوبی ساحلندن دخی ایران طوپراغندن كلن (بالق صویی) و (آق صو) چایلرندن عبارتدر. بو صوك چایك تلاقیسندن صكره آراس نهری (اورداباد) ایله (میكری) آره سنده واقع (آراسبار) اسمنده غایت مدهش بر بوغازدن چكر. اورادن تا (كور) نهریله بر لشنجه یه قدر ٢٤۰ كیلومتره لك مجراسنك صاغ طرفی ایرانك آذر بایجان ایالتی و صول طرفی دخی روسیه نك قره باغ نام مملكتی ممتد اولور. بو مسافه ده دخی صاغدن (آهر) ایله (قره صو) یك اجتماعندن حاصل اولان (دهاریور) چایی. وصولدن دخی بر طاقم كوچك دره لر آراسه دوكیلور. آراسك جریانی منبعندن تا (اورد اباد) شلاله سنه قدر غایت سرت وخیزلی اولوب، مواقع مختلفه سنده دفعاتله یاپیلان كوپریلردن یالكز ایكی اوچی طیانه ییلمشدر. (اورداباد) دن (میكری) یه قدر بربرینی متعاقب بر طاقم شلاله لر تشكیل ایده رك، ١٧ كیلومتره لك مسافه ده ٤٢٥ متره آشاغی دوشر، ودوشر كن اوزاقدن ایشیدیلیر بر كورلدی حاصل ایدر. بعده ایكی طرفی قیالق طاغلرله محاط اولان (آراسبار) بوغازینی دخی چكد كدن صكره، دوز یره دوشوب، كنیش بر مجراده بر چوق آطه لر تشكیل ایده رك، بحر حززدن ٢٧ كیلومتره یوقاریده (كور) نهریله برلشیر. وهرنه قدر، كه آراسك صویی دهازیاده ایسه ده، نقطۀ تلاقیدن آشاغی (كور) نامنی آلیر. نقطۀ تلاقیدن دكیزه قدر ممتد اولان و (دشت
مغان) دنیلن اووه حالا دكیز بوجكی قبوقلریله مملو اولوب، نهرلرك ایندیردكلری قوم و چامور یاردیمیله دكیزدن قره یه تحول ایتمش اولدیغی آكلاشیلیور.
Kamusul Alam, Şemseddin Sami; Kamusul Alamde Aras maddesi. osmanlıcada Aras ne demek, Aras anlamı manası, Aras osmanlıca nasıl yazılır. Osmanlıca sözlükte Aras hakkında bilgi. Arapça Aras ne demek. Arapça osmanlıca sözlük. Farsçada Aras anlamı
Kamusul Alamde - آراس Aras maddesi. Şemseddin Sami, Kamusul Alam Ansiklopedisi
Aras ~ آراس güncel sözlüklerde anlamı:
ARAS ::: Yorgunluk, bitkinlik. * Hayranlık.
aras ::: (a. i.) : yorgunluk, bitkinlik.
aras ::: yorgunluk , bitkinlik , hayranlık
aras ::: (a. i.) yorgunluk, bitkinlik.
ARAS :::