Aragon - آراغون

اسپانیانك شمال شرقی جهتنده بر مملكتدر، كه شمالاً (پیرنه)‌ طاغلریله، شرقاً (قتالونیه) مملكتیله، شرق جنوبی طرفندن (ولنسیه)، غرب جنوبی طرفندن یكی قشتاله (ویاقستیله)، غرباً اسكی قشتاله و (ناواره) قطعه لریله محاط اولوب، قسم اعظمی (ابرر) نهرینك حوضه سنده عبارتدر. شمالدن جنوبه طوغری َ٥٦ ْ٤٢ عرض شمالیدن َ٥٧ ْ٣٩ عرض شمالی یه قدر ممتد اولوب، طول اعظمی ٣٣٥ كیلومتره، وسطحی ٤٦٥٦٥ مربع كیلومتره در. بو قطعه بر ولایت اعتبار اولندیغی وقت، مركزی (سراغوسه) شهری ایدی، كه عربلرك (سرقسطه) دیدكاری شهردر. بوكون ایسه اسپانیا حكومتی بونی (سراغوسه)، ‌(هوىٔسقه) و (تروىٔل)‌ ایالتلری نامیله اوچ ایالته تقسیم ایتمشدر. بوقطعه نك اهالیسی ٩٣۰۰۰۰ كشیدر. آراغونك وسطی، غربدن شرقه ابرو نهریله شق اولنه رق كنیش اووه لردن عبارت ایسه ده، شمال وجنوب طرفی طاغلقدر. شمال طرفنده كی طاغلرك اكثریسی پیرنه سلسلۀ جبالندن عموداً آیریلوب، جنوبه طوغری ممتد اولورلر، وآره لرنده كی وادیلردن اینن دره لر وچایلر (ابرو)‌ یه دوكیلور. مع هذا (سیرا غواره) و (سیرا پنیا)‌ كبی پیرنه سلسله سنه متوازیاً غربدن شرقه اوزانیر بعض طاغلر دخی واردر، كه آیریجه بر سلسله تشكیل ایدرلر. جنوب طرفنده ایسه طاغلر بربرینه مربوط اولوب، بونلرك اك مرتفعی ده (مونقایو) طاغیدر، كه پیرنه دن ماعدا اسپانیانك اك یوكسك طاغلرندن اولوب، حذای بحردن ٢٣٤٨ متره ارتفاعی واردر. بو طاغ سراغوسه نك ٥٧ كیلومتره غربنده اولوب، (ابرو) ‌ایله (دویرو)‌ نهرلرینك حوضه لرینی آیریور. رعد وصاعقه وبوره لرینك كثرتیله جوارلرینه دهشت اندازدر. بونك ‌جهت جنوبیه سنده بولنان (سیرا یاوالامبر) اسپانیانك تقسیم میاه نقطه لرینی تشكیل ایتمكله، بونلردن نبعان ایدن صولر بر طرفدن آق دكیزه ، بر طرفدن ده بحر محیط اطلاسی یه دوكلمك اوزره هر طرفه آقیور. آراغونك باشلیجه نهری (ابرو) ایرماغی اولوب، صاغدن یعنی شمالدن بو

ایرماغه بر چوق چایلر دوكیلور، كه بو نلرك باشلیجه لری : مملكته بواسمی ویرن (آراغون) نهریله آربا، غالغو، القنطره، ایسوىٔلا، سینقه، اسرا، وآراغون ایله قتالونیه حدودینی آیران (لوغوىٔرا ریباغورزانه) چاییدر. بو صوك بش چایلر (ابرو) نك باشلیجه شعبه سی اولان (سغرو) نهرینه دوكیلیورلر. صاغدن یعنی جنوب طرفندن آراغون قطعه سی داخلنده (ابرو) یه دوكیلن چایلرك ده باشلیجه لری: (جیلوقه) ایله دخی برلشن (جالون)، هوىٔورا، آغوآس، مارتن، غوآد الوپه وماتارانه نهرلریدر. (سراغوسه) نك جوارنده (ابرو) نهری ١۰۰ كیلومتره لك مسافه ده سیر سفاىٔنه صالح اولدیغندن، مجرای طبیعیسنه متوازیاً بر قنال كشادی وقتیله تصور اولنوب، تا (شارل كینت)‌زماننده باشلانمش، ومیلادك اون سكزنجی عصرنده شمدیكی درجه یه قدر كتیرلمش ایسه ده، اكمال اولنه مامشدر. آراغون مملكتنك طاغلری شایان تماشا ایسه ده، آلچق یرلری قورو ولطافتسز وهیىٔت عمومیه سی حزن انكیز بر صورتده اولوب، اكثر طرفلری معمور دكلدر. اك بیوك قصبه سی (سراغوسه) شهری اولوب، ٥٦۰۰۰ اهالیسی واردر. ساىٔر قصبه لری ایچنده تجارت ویاموقع و تاریخجه بر آز اهمیتی اولانلر: هوىٔسقه، مونزونه، بارباسترو، یاقه، القانیز، قلاتایود [قلعة ایوب]، تارازونه، تروىٔل، الباراچین، وساىٔره در. مملكتده بر قاچ دمیر یولی انشا اولنوب، باشلیجه لری بارسلونه [بر شلونه] دن كلوب، سراغوسه دن چكه رك، مادریده واورادن ده برطرفدن قارتاجینه وبرطرفدن قادیسه قدر ممتد اولان بیوك خط ایله، سراغوسه دن آیریلوب، شمال غربی یه طوغری كیدن وغاسقونیه كورفزی ساحلندن فرانسه دمیر یوللریله برلشن خطدر. زراعتك پك كری بولنمسیله برابر، حبوبات، ایی شراب، زیتین یاغی، صفران، ایپك، كتن، قناو وساىٔره حاصل اولور. وكلیتلی قویون یتیشیر. صنایع محلیه باشلیجه قبا بر جنس چوخه ایله قالین بز وقونیاق وصابون اعمالندن عبارتدر.

صوىٔوق بر طور وحاللری واردر، ویالكز عسكر لكده ساىٔر اسپانیوللردن زیاده جسوردرلر. بونلر اسكی وقتدن بری بر طاقم امتیازاته ناىٔل اولوب، بو امتیاز لرینك محافظه سیچون دفعاتله سلاحه صارلمشلردر. و هر نه قدر كه آرتق حكومتك اصول مشروطیتی اسپانیانك هر طرفیچون مساوی ایسه ده، بونلر امتیازلرینك فسخ اولندیغنی تسلیم ایتمك ایستمیورلر. عمومیت اوزره آراغونلیلر قره صاچلی وقره كوزلی اولوب، كبارلری آلافرانغه كینمشلرسه ده، عوام اهالینك كندیلرینه مخصوص قیافتلری واردر. آراغون مملكتی اسكی یونان وروما تألیفاتنده (كلتیبر) تسمیه اولنان، و (كلت) اقوامیله (ایبر) اقوامندن مشتركاً مسكون بولنمش اولدیغی اسمندن آكلاشیلان مملكتك برقسمی اولوب، میلادك ٤٧۰ تاریخنده رومالیلردن (غوت) قومی طرفندن ضبط اولنمش، و ٧١٤ تاریخ میلادیسنده خلفای بنی امیه زماننده غزاة مسلیمنك الینه چكوب، ممالك اسلامیه داىٔره سنه داخل اولمشیدر. اندلس حكومت اسلامیه سنه ضعف طاری اولمغه باشلادیغی وقت، اك اول آراغونك‌ سراغوسه ایله پامبلونه آره سنده آراغون شهری قربنده واقع (سوبرابره) ناحیه سنده كوچك بر خرستیان اداره سی تشكل ایدوب، مرور زمانله، وملوك اسلامیه نك ضعف وتفرقه سی آرتد قجه، توسع ایده رك، نهایت میلادك ١۰٦٧ تاریخنده حكومت ادعاسنده نولنه جق قدر بیومكله، (آراغون) قونتلغی نامنی آلمش، و ١١١٨ ده سراغوسه نك دخی ایادیْ مسلمیندن چیقمسیله، قونتلرندن برنجی (آلفونس) و‌ (رایموند برنجی)‌آراغونك ساىٔر طرفلرینی دخی قبضۀ تصرفلرینه آلمشلردر. قونتلرندن (رامیر) ك قیزی و وارثە سی (پترونیله)‌ نك برسلونه قونتی (رایموند برنجی) ە وارمسیله بر سلونه كبی كوزل بر‌مملكت ‌دخی آراغونه التحاق ایتمش اولدیغی كبی، بعده قتالونیه دخی برنجی (ژاق)‌ طرفندن ضبط اولنمغله، آراغون قراللغی تشكل ایده رك، اوروپا دولتلری صره سنده صایلمغله باشلامش ایسه ده، مؤخراً قرالی بولنان فردنیان قتولیكك قشتاله ولیون قرالیچه سی (ایزابلا) ایله عقد ازدواج ایتمسیله، بو ایكی مملكت برلشه رك، وغوناطه یه مخصر قالمش اولان حكومت اسلامیه نك بسبتون اسپانیادن چیقارلمسیله، بو شبه جزیره نك ساىٔر طرفلری دخی الحاق

ولنه رق، بر اسپانیا دولتی تشكل ایتدیكندن، آراغون برولایت حكمنده قالمش؛ ونهایت اخیراً اسپانیانك تقسیمات جدیده سی صره سنده اوچ ایالته تقسیم اولنمش، كه نونلرك سطحی واهالیسی وجه آتی اوزره در: سرغوسه ایالتی ١٧١١٢ مربع كیلومتره ٤۰٢۰۰۰ اهالی هوىٔثقه‌ )) ١٥٢٢٤ )) ٢٧٥۰۰۰ )) ترىٔل )) ١٤٢٢٩ )) ٢٥٢۰۰۰ )) جمعاً آراغون قتعه سی ٤٦٥٦٥ )) ٩٢٩۰۰۰