Arac - آراج

قسطمونی ولایت وسنجاغنده بر قضادر، كه مركوزه، اكدیر وبویالی ناحیه لرینی دخی جامع اولوب، ٥٦ قریه ١٥٦٥۰ اهالی یی حاویدر. مركزی (یازی كویی) جوارنده بر تپه ده اولوب، حكومت قوناغنك اوكندن چكن (آراج) نهری كنارنده بهر هفته انعقاد ایدن بازار محلنده بر جامع شریف ایله ٢٥ دكان واردر. بو قضا شرقاً قسطمونی، غرباً زغفرانبولی، جنوباً كنغری سنجاغنه ملحق چركش، شمالاً دخی طاطای قضالریله محدود اولوب، مركزی قسطمونینك غرب جنوبیسنده و اون ساعتلق مسافه ده واقعدر. بو قضا داخلنده ٤٦ جامع شریف ومسجد، ٣٧ مكاتب صبیانیه، ٣٦ دكرمن و ٤٧ صو حزاری واردر. اكریجه اووه، بوز آمرود، آت اسكی،چناق، قطارلمه، قره دره، عثمان كولی، آق تپه ناملریله سكز اورمانی اولوب، مجموعی‌٤١٢۰۰۰ دونمدن، واشجارلری اكثری قره و صاری چام، كوكنار ومیشه دن عبارتدر. محصولاتی باشلیجه حبوبات، كراسته، یاغ وتفتیكدن عبارتدر.