İbrahim Paşa - ابراهیم پاشا

سرعسكر اسبق رضاپاشانك اوغلی اولوب، مكتب فنون حربیه ده بر مدت دوامدن صكره، ضبابط چیقه رق، وقطع مراتب عسكریه یه باشلایه رق، نهایت فریقلك رتبه سیله دار شورای عسكری اعضالغنه نصب اولنمش ایدی. ١٢٧٧ تاریخنده مصرلی عباس پاشازاده الهامی پاشادن طول قالمش اولان كریمۀ حضرت عبدالمجید خانی منیره سلطان ایله عقد ازدواج ایده رك، مصاهرت شهریاری شرفنه ناىٔل اولمشدر. دور سلطان عبدالعزیز خانیده بر آره لق رتبه سی روم ایلی بكلربكلیكنه تحویل ایله، شورای دولت اعضالغنده بولنمش؛ و بعده ینه رتبۀ عسكریه سی اعاده اولنه رق، دار شورای عسكری اعضالغنه تعیین اولنمش؛ و ١٢٩٤ ده دار شورای مذكورك رىٔیس و كیلی ایكن، دردنجی اردوی همایونه مأمور اولوب، ارضرومه كیتمش، وبر قاچ آی مرورنده تبدیل هوا مقصدیله درسعادته عودت ایتمكده ایكن، طربزونده وفات ایتمشدر.