Anglo Saxons - آنغلو ساقسون

آلتنجی عصر میلادیده آلمانیانك شمال طرفلرندن هجومله، انكلتره یی ضبط ایتمش اولان آنغل، یوت وساقسون قوملرینه ویریلن اسمدر. انكلتره نك اوندن اولكی اهالیسی كلت دنیلن امت قدیمه یه منسوب اقوامدن اولوب، كندی باشلرینه اداره اولنمقده ایكن، (توتون) یعنی جرمان امتنه منسوب اولان اقوام ثلثۀ مذكوره بر تانیایی ضبطله، (هپتار خیا) یعنی ((یدیلر حكومتی )) نامیله بر دولت تشكیل ایده رك، میلادك ١۰٦٦ تاریخنه دك آلتی عصر حكم سورمشلردر. اقوام مذكوره اوقدر جمعیتلی هجوم و هجرت ایتمشلردی، كه مرور زمانله كندیلرینك لسانی بر تانیانك لسان عمومیسی حكمنه چكوب، اهالىٔ اصلیه سی اولان زواللی كلتلر ایسه یالكز اسقوچیا، ایرلانده، و والس مملكتلرینك بعض طرفلرنده و جزایر صغیره ده قومیت و لسانلرینی محافظه ایده بیلمشلردر؛ آنجق بونلر دخی كیتدكجه لسان عمومی یی اوكرنوب،‌كندی لسانلرینی ترك و فراموش ایتمكده درلر. میلادك ١۰٦٦ تاریخنده عن اصل اسقاندیناولی یعنی دانیمارقه، اسوج و نوروج اهالیسندن اولوب، قورصانلقله فرانسه نك شمال غربی كوشه سنی ضبط ایتمش، و كندیلری ((شمال آدملری )) معناسیله (نورماند) و دها طوغریسی (نورتمان) تسمیه اولندقلری كبی، مملكت مذكوره نك دخی (نورماندیا) دنیلمسنه سبب اولمش اولان نورماندلرك رىٔیسی برنجی (كوییوم) انكلتره یه هجومله، مملكتی كاملاً ضبط، و اراضی یی تیمار صورتیله آرقداشلرینه تقسیم و توزیع ایده رك، آنغلو ساقسونلری دخی سلفلری اولان كلتلر كبی محكوم حالنه قویمشدر. نورماندلر فرانسه یه هجرت ایده لی كندی لسان اصلیلری اولان اسقاندیناوجه یی اونوده رق، فرانسزجه لسان مادرزالری حكمنه كچمش اولدیغندن، مرقوم كوییوم و خلفلری انكلتره اهالیسنی اساسی توتون یعنی جرمان لسانندن عبارت اولوب، بر چوق كلتجه كلماتی دخی بالقبول، مرور زمانله خیلی تبدلاته دخی اوغرامش اولان آنغلو ساقسونلرك لسانی بو دفعه مملكتك لسان رسمیسی حكمنه‌ كچن فرانسز-

جه دن دخی بر چوق كلمات و تعبیرات اخذ ایده رك، بویله بر خلیطه دن عبارت اولان لسان مرور زمانله دها بر طاقم تبدلاته اغرایه رق، و صانكه بو جسیم آطه یی قاپلایان سیسلی ورطوبتلی هوانك ایجابندن اولان بو غوق و كسیك بر تلفظه دخی تابع اوله رق، شمدیكی انكلیزجه حالنه كیرمشدر. بو وجهله انكلیزلر نسلا ونسباً كلت ایله توتون ولساناً باشلیجه توتون امتنه منسوب اولوب،‌اقوام جرمانیه دن معدود اولدقلری حالده، تركجه ده بر چوق كلمات و تعبیرات عربیه بولندیغی كبی، بونلرك لساننده دخی فرانسزجه دن مأخوذ ولاتینجه یه منسوب بر چوق اصطلاحات و تعبیرات بولنیور. [((انكلیز)) ماده سنه مراجعت.]