Adria ~ آدريا
Kamus-ul'Alam - Adria ~ آدريا maddesi. Sayfa: 53 - Sira: 2
Adria - آدريا
ایتالیای شمالینك وندینك مملكتنده بر شهریدر، كه (آدیج) ایله (پو) نهرلری آره سنده، و (روویغو) شهرینك ٢۰ كیلومتره شرقنده آدریاتیق دكیزینك دخی ٢۰ كیلومتره بعد نده واقع اولوب، ١٤۰۰۰ اهالیسی واولدقجه تجارتی واردر. زمان قدیمده (آدریا) شهری غایت اهمیتلی اولوب، مؤخراً بو اهمیت وندیك شهرینه انتقال ایتمشدر. حتی وندیك كورفزی دخی بو شهره نسبتله (آدریاتیق) تسمیه اولنمشدر. اسكی شهر ساحلده بولنمش اولدیغی حالده، نهرلرك ترسباتی یاردمیله ساحلك دكیزك ایچنه طوغری اوزانمسندن، اونك خرابه لری اوزرنده مبنی اولان شهر جدید دكیزدن ٢۰ كیلومتره اوزاقدر. نهرلرك اوراده ایندیر دكلری چامورلر او قدر چوقدر، و سطح ارض بوترسباتدن اوقدر ارتفاع ایدیور، كه اوچ بیك سنه ظرفنده بربری اوستنه ایكی جسیم شهر یره كوملمشدر. حقیقةً، اسكی (آدریا) شهرینك خرابه لری شمدیكینك آلتنده یره مدفون اولدیغی كبی دها درین حفریات اجرا اولندقده اونك دخی دها قدیم بر دیكر شهرك یره كوملمش خرابه لری اوزرنده بنا ایدلمش اولدیغی آكلاشمش. و بو ایكنجی طبقه ده كی خرابه لرك ایچنده رومالیلرك زماننه دلالت ایده جك بر شی بولنمیوب، اور الرك دها قدیم اهالیسی اولان (اتروسق) لرك آثارینه تصادف اولنمشدر. اسكی
(آدریا) شهری میلاددن ١٣٧٦ سنه اول اتروسقلر طرفندن بنا اولنمش، میلاددن یدی عصر اول فرانسه نك اهالیٔ قدیمه سی اولان غاللره چكمش، وقبل المیلاد ٢١٣ تاریخنده رومالیلر طرفندن ضبط اولنمشدر.
Kamusul Alam, Şemseddin Sami; Kamusul Alamde Adria maddesi. osmanlıcada Adria ne demek, Adria anlamı manası, Adria osmanlıca nasıl yazılır. Osmanlıca sözlükte Adria hakkında bilgi. Arapça Adria ne demek. Arapça osmanlıca sözlük. Farsçada Adria anlamı
Kamusul Alamde - آدريا Adria maddesi. Şemseddin Sami, Kamusul Alam Ansiklopedisi