İbni Ebi s Sac - ابن ابی الساج

(افشین محمد _ دیوداد) خلفای عباسیه نك عامللرندن اولوب، ارمنستان و جبال عامل ایكن، ١٧٦ تاریخنده مصر حاكمی ابن طولونك اوغلی (ابو الجیش خمارویه) ە قارشی عسكر سوق ایتمش؛ و شامده واقع اولان محاربه ده مغلوب و استیمانه مجبور اولمش ایسه ده، مؤخراً ینه عمال عباسیه دن اسحاق بن كنداجله برابر خمارویهه قارشی محاربه یه قرار ویروب، خلیفه موفق باللهدن استمداد ایله، بغداددن كوندیلن خلیفه نك اوغلی ابو العباس احمد معتضدك معیتنده خمارویهله مخاربه ایدوب، غالب كلمشلردی. مؤخراً صاحب ترجمه (قنسرین) و ابن كنداج جزیره و موصل و الیسی ایكن، بینلرنده نفاق دوشوب، ابن ابی الساج خمارویهه ن استمداد ایتمش، و اونك نامنه خطبه اوقودوب، اوغلنی دخی رهن معامنده مصره كوندرمش؛ و مصردن كلن امدادله ابن كنداجی مغلوب ایدوب، جزیره یی ضبط ایتمشدی. ٢٧٥ تاریخنده، ابن كنداج مصره كیدوب، خمارویهله اتفاق ایتدیكندن، ابن ابی الساج مصر حاكمنه عصیان ایده رك، دمشق جوارنده واقع اولان محاربه ده ابن ابی الساج مغلوب اولمش، و تعقیب اولنه رق، تكریته قدرقاچمش ایسه ده، اوراده ابن كنداج ایله واقع اولان بر محاربه ده غالب كلوب، خصمنی دمشقه قدر تعقیب ایتمش، و خلیفۀ بغداددن امداد ایستمش ایدی. آنجق خمارویهك بیوك بر عسكر لك كلدیكنی خبر آلنجه، مقاومت ایده میه جكنی آكلایه رق، ٢٧٦ ده چكیلوب، خلفیه یه التجا ایتمش؛ و اوسنه آذربایجان و الیلكنه نصب اولنه رق، ٢٨٨ ده وفات ایتمشدر.