İbni Ebi d Davud - ابن ابی دواد

(قاضی ابو عبدالله احمد) خلفای عباسیه دن معتصمك زمان خلافتنه قاضی القضاة اولوب، فقه و كلامده و شعر وادبیاتده مشهور ایدی. خلیفۀ مشارالیهك عندنده قدر و اعتباری بر درجه ده اعلا و قول و حكمی بر صورتده نافذ ایدی، كه خلیفه یی بر چوق دفعه حقسز اوامرینی كری آلمغه مجبور ایتمش، و اعداملری امر اولنمش نیجه آدملری قورتارمش؛ و پك چوق امور خیریه و نافعه یاپدیرمغه موفق اولمشیدی. اك اول مأمون خلیفه یه انتساب ایدوب، مشارالیه طر-

فندن برادری معتصمه توصیه اولنمش؛ و معتصمك اوغلی واثقك زمان خلافتنده دخی قاضی القضاة بولنمش؛ و آنجق بونك برادری متوكلك جلوسندن صكره، فلحه مبتلا اولمغله، اوغلی محمد یرینی طوتمشیدی. كدیسی معتزله دن و خلق قرآنه راضی اولانلردن اولوب، روایته كوره، ٢٢۰ تاریخنده بوبابده امام ابن حنبل ایله مباحثه ایدوب، امام مشارالیهی الزام ایتمشیدی. ١٦۰ تاریخنده بصره ده طوغوب، ٢٤۰ تاریخنده بغدادده وفات ایتمشدر.