Aksarayi ~ آقسرایی
Kamus-ul'Alam - Aksarayi ~ آقسرایی maddesi. Sayfa: 264 - Sira: 3
Aksarayi - آقسرایی
(شیخ جمال الدین محمد _) غازی خداوندكار حضرتلرینك دور سلطنتلرنده یتیش اعاظم علمای رومدن اولوب، روایته كوره، امام فخر الدین رازینك نسلندندر، یعنی امام مشارالیه صاحب ترجمه نك پدرینك جدیدر. علوم عربیه وشرعیه وعقلیه ده كامل وفاضل وتقی بر ذات اولوب، حلقۀ تدریسنه علما وفضلادن بر جم غفیر طوپلانیردی. قونیه ولایتنده كی آقسرای شهرنده (مدرسۀ سلسله) نامیله مشهور مدرسه نك مدرسی ایدی. بو مدرسه نك بانیسی مدرسلكه تعیین اولنه جق ذاتك صحاح جوهری یی ازبردن بیلمسنی شرط قویمش اولدیغندن، صاحب ترجمه نك علم لغتده بومدرسلكه كسب استحقاق ایده جك قدر یدطولاسی اولدیغی آكلاشیلیور. طلبه سنی اوچ صنفه تقسیم ایدوب، بر صنفنه مدرسه یه كیدر كن، بر صنفنه مدرسه نك خارجنده، ودیكرینه ده داخل مدرسه ده درس كوستریر، وقدمای حكمای یونانه تقلیداً برنجی صنفه (مشاىٔیون) وایكنجیسنه (رواقیون) نامنی ویرر ایدی. علامۀ مشهور فناری دخی او وقت كنج اولوب، صاحب ترجمه نك رواقیون طلبه سی زمره سنه داخل ایدی. تقریر وافاده سی فوق العاده صورتده ایدی. تفسیر (كشاف) ە حاشیه لر یازمش اولدیغی كبی، علم معانیده (ایضاح) عنوانلی كتابی وطبه متعلق اولان (انموذج) نام اثری دخی شرح ایتمشدر. روایته كوره سید شریف جرجانی شیخ جمال الدین آقسرایینك صیت وشهرتنی ایشیدنجه، ملاقاتی آرزسیله دیار رومه عزیمت ایتمش، وآنجق ایضاح شرحنی كورنجه، كتاب مذكورك متنی مفصل اولوب شرحه محتاح اولمدیغندن، ومتن سرخله یازیلوب، سیاهله یازلمش اولان شرح عباره لری متندن دها آز اولدیغندن، سید شریف بو شرحی لطیفه طریقیله صیغیر اتنه قونمش سینكه تشبیه ایتمش. وشارحك افاده سی تألیفندن ایی اولدیغنی ایشیدنجه، كوریشمك اوزره آقسرایه كیتمش ایسه ده، بو شهره دخولی شیخ جمال الدینك جنازه سنك دفنی كوننه تصادف ایتمش؛ ویالكز فناری ایله كوریشوب، بعده برابر مصره كیتمشلردر.
Kamusul Alam, Şemseddin Sami; Kamusul Alamde Aksarayi maddesi. osmanlıcada Aksarayi ne demek, Aksarayi anlamı manası, Aksarayi osmanlıca nasıl yazılır. Osmanlıca sözlükte Aksarayi hakkında bilgi. Arapça Aksarayi ne demek. Arapça osmanlıca sözlük. Farsçada Aksarayi anlamı
Kamusul Alamde - آقسرایی Aksarayi maddesi. Şemseddin Sami, Kamusul Alam Ansiklopedisi