İbni Usfur - ابن عصفور

(ابو الحسن علی بن موسی الحضرمی) اندلسك اعاظم ادباسندن اولوب، عربیاتده بینطیر ایدی. عمرینی مطالعۀ كتبله كچیره رك، ابدی مطالعه دن اوصانمازدی. اندلسك اشبیلیه، شریش، مالقه، لورقه و مرسیه شهرلرنده تدریس ادبیات ایتمش، و بر چوق كتابلر یازمشدر. ٥٩٧ تاریخنده اشبیلیه ده طوغوب، ٦٦٩ ده تونسده وفات ایتمشدر. باشلیجه تضنیفاتی شونلردر : ((الممتع))، ((المفتاح))، ((الهلال))، ((الازهار))، ((انارة الدیاجی))، ((مختصر الغرة))، ((مختصر المحتسب))، ((السالف و العذار))، ((شرح الجمل))، ((المقرب))، ((البدیع))، ((شرح الجزولیة))، ((شرح المتنبی))، ((شرح الحماسة))، ((سرقات الشعراء))، ((شرح الاشعار الستة))، ((شرح المقرب))، كوزل اشعاری دخی واردر.