İbni Arabi - ابن عربي

(ابو بكر محی الدین محمد بن علی الطاىٔی الحاتمی الاندلسی) مشاهیر صوفیوندن اولوب، مغربده (ابن العربی) اسمیله معروف ایسه ده، شرقده ابو بكر ابن العریدن فرق ایچون، حرف تعریفسز استعمال تعمم ایتمشدر. (محی الدین عربی) و (شیخ اكبر) اسملریله دخی معروفدر. ٦٥۰ تاریخنده اندلسك مرسیه شهرنده طوغوب، ٨ یاشنده ایكن اشبیلیه یه كبده رك، اوراده تحصیل علوم، و ابن بشكوال كبی مشاهیردن استفاده ایتدكدن صكره، ٥٩٨ تاریخنده شرقه رحلتله، بر مدت مكۀ مكرمه ده اقامت، و بعده مصر و شام و عراق و حزیره و آناطولی جهتلرنده سیاحت، و ابن عساكر و ابو الفرج ابن جوزی كبی مشاهیردن استماع و استفاده ایتمشدر. فضل و كمالی و حقایق ربانیه و اسرار الهیه یه اولان و قوف و عرفانی شهرت كیر آفاق اولمغله، طواىٔف ملوك طرفندن كندیسنه بر چوق تخصیصات تعیین اولندیغی حالده، جمله سنی تصدق ایدوب، فقر وریاضتله یاشامغی ترجیح ایدردی. اكثر تألیفاتی تصوفه متعلق مساىٔل غامضه یی متضمن اولمغله، طریق تصوفه منسوبیتلری اولمیان بر طاقم جهلۀ متعصبین حضرت شیخه اعتراضله، تكفیرینه قدر یوریمشلر ایسه ده، كندیسنك اویله بر شاىٔبه دن مبرا اولدیغی ارباب عرفان عندنده محققدر. قونیه ده بولندیغی صره ده مشاهیر علمادن صدرالدین قونوینك طول بولنان والده سنی تزوج ایتمشدی. ٦٣٨ تاریخنده دمشقده ارتحال ایدوب، جبل قاسیون اتكنده دفن اولنمشدر. ارباب تعصبك اجباریله مرقد شریفی مزیله حالنه قونمش ایكن، یاوز سلطان سلیم حضرتلری دمشق شامی فتح ایتدیكنده، محقق مشارالیهك مر-

قدینی تطهیر و تنظیف و مكمل صورتده تربه سنی انشا بیورمشلردر. باشلیجه آثاری شونلردر : ((الفتوحات المكیه))، ((فصوص الحكم))، ((التدبیرات الالهیه والتنزلات الموصلیه))، ((تاج الرساىٔل و منهاج الوساىٔل))، ((كتاب العظمة))، ((كتاب السبعة))، ((مفاتیح الغیب))، ((التجلیات))، ((كتاب الحق))، ((مراتب علوم الوهب و الاعلام باشارات اهل الالهام))، ((العبادة))، ((الخلوة))، ((المدخل الی معرفة الاسماء))، ((كنه مالابدمنه))، ((النقباء))، ((حلیة الابدال)) ((الشروط فیمایلزم اهل طریق الله))، ((اسرار الخلوة))، ((عقیدة اهل السنة))، ((المقنع ایضاح السهل الممتنع))، ((اشارات القولین))، ((كتاب الهویة والاحدیة))، ((الاتحاد العشق))، ((الجلالة))، ((الازل)) ، ((القسم))، ((عنقاء مغرب))، ((ختم الاولیاء))، ((شمس المغرب))، ((الشواهد))، ((مناصحة النفس))، ((الیقین))، ((تاج التراجم))، ((القطب))، ((رسالة الانتصار))، ((الحجب))، ((الانفاس العلویة))، ((ترجمان الاشواق))، ((مواقع النجوم))، ((مطالع اهلة الاسرار))، ((المواعظ الحسنة))، ((المبشرات))، ((خطبة ترتیب العالم))، ((لجلال و الجمال))، ((مشكاة الانوار فیما روی عن الله عزوجل من الاخبار))، ((شرح الفاظ التی اصطلحت علیهاالصوفیة))، ((محاضرات الابرابر و مسامرات الاخیار))، بونلردن بشقه ((سورة الكهفه قدر تفسیر كبیری)) و دها بر چوق تألیفاتی اولوب، مجموعنك عددی درتیوزه بالغ اولور. بونلردن ((فتوحات مكیه)) و ((فصوص)) و ((محاضرات)) ایله ساىٔر بعضلری مطبوعدر. ((فصوص)) ك متعدد شرح و ترجمه لری دخی واردر. شو قطعه جملۀ اشعارندندر : اذا حل ذكر كم خاطری، فرشت خدودی مكان التراب واقعد نی الذل فی بابكم قعود الاساری لضرب الرقاب