İbni Asakir - ابن عساكر

(ابو القاسم علی بن حسن) لقبی ثقة الدین و یاخود نورالدیندر. مشاهیر مورخیندن اولوب، فقه و حدیثده دخی ید طولی صاحبی ایدی. ٤٩٩ تاریخنده دمشقده طوغوب، بعدالتحصیل، استماع احادیث شریفه و اكمال معلومات مكتسبه مقصدیله عراقین و خراسان طرفلرینه سیاحت ایتمش؛ و ارباب تقوی و قناعتدن اولمغله، امور دنیایه و امرا و اغنیایه التفات ایتمیوب، تعلیم و تألیف و عبادته حصر اوقات ایتمشیدی. دمشق شامك ٨۰ جلد اوزره بر مكمل تاریخنی یازمشدر، كه خطیب بغدادینك بغداد تاریخی كبی بر محیط اعظم اولمغله، غایت مقبول و معتبر اولوب، بر چوق مورخلر طرفندن اختصار دخی اولنمشدر. بوندن بشقه ((الموافقات)) ، ((الاطراف للسنن))، ((معجم الشیوخ))، ((مناقب الشباب)) كبی بر چوق آثار نفیسه سی واردر. ٥٧١ تاریخنده دمشقده وفات ایدوب، صلاح الدین ایوبی دخی جنازه سنده حاضر بولنمشدر. اشعار راىٔقه سی دخی اولوب، شو قطعه او جمله دندر : ایا نفس ویحك جاء المشیب فما ذا التصابی و ماذا الغزل تولی شبابی كاءن لم یكن وجاء مشیبی كان لم یزل