İbni l Amid - ابن العميد

(ابو الفضل محمد بن حسین) پدری نوح نصر سامانینك كاتبی اولوب، بو مناسبتله، اهل خراسانك عادتی اوزره عمید لقبیله تلقیب اولنمشیدی. كندیسی ایسه آل بویه دولتنك اخص رجالندن اولوب، عضدالدوله نك پدری اولان ركن الدین ابو علی حسنك رىٔیس الوزراسی ایدی. ٣٢٨ تاریخنده بو مستدی احراز ایتمشیدی.‌ انشا و كتابتده عصرینك فریدی اولوب، ثعالبی بو فنه عبدالحمید ایله بدأ اولندیغنی و ابن عمید ایله ختام ویرلدیكنی بیان ایدیور. ادبیاتده و حفظ اشعار و اخبار عربده و تاریخده ید طولی صاحبی اولدیغی كبی، علم هیىٔت و نجوم وساىٔر فنوندن دخی بهره سی وار ایدی. هله سیاسیات وادارۀ ملك فننده و فن حربده بینظیر اولوب، اخلاقی دخی غایتله ممدوح ایدی. آنجق نقریس و قولنج علتلرندن بیزار و خسته مزاج ایدی. ٢٤ سنه وزارت ایتدكدن صكره، ٣٦۰ تاریخنده وفات ایتمشدر. عضدالدوله نك معلم و مریسی بولنمشدر. ((الخلق و الخلق)) عنوانیله بر كتاب یازمش ایسه ده، مسوده حالنده براقمشدر. محرراتی مشهوردر، و بعض اشعاری دخی واردر.