İbrahim Levhı Hıvan - ابراهیم لوح خوان

عن اصل بر غمه لی اولوب، مملكتنده اكمال تحصیل ایتدكدن صكره، درسعادته كله رك، آیاصوفیه مدرسی مولی ابو اللیثك معاونی اولمش؛ و بعده پایتختك‌ و ادرنه نك بر قاچ مدرسه سنده مدرسلك ایتدكدن صكره، مغنیساده كی سلطان مراد مدرسه سنه تعیین اولنمش؛ و سلطان محمد خان ثالثك جلوسنده ١۰۰٣ ده بروسه قاضیسی اولمش؛ و مؤخراً سنان پاشانك تأسیس ایتدیكی دارالحدیث مدرسلكنه نصب اولنه رق، وفاتنه دكین اون سنه بو مدرسه ده تدریس و افاده ایله مشغول اولمشدر. عالم و فاضل بر ذات اولوب، علی الخصوص حدیث و تفسیر و علم كلامده یدطولی صاحبی ایدی. علم كلامده متن اوله رق ((نظم الفراىٔد فی سلك مجمع العقاىٔد)) عنوانیله كوزل بر كتاب تألیف، و بو كاینه كندیسی بر مكمل شرح تحریر ایتمشدر. تفسیره متعلق دخی بر چوق رساىٔل و تعلیقاتی واردر. ورع و تقوی و عفتی دخی علمیله متناسب ایدی. ١۰١٤ سنه سی ذی الحجه سنده ارتحال ایتمشدر.