İbrahim Kazaz - ابراهيم قزاز

(شیخ _ بن تیمور خان) عن اصل بو سنه لی اولوب، زاهد و متقی بر ذات اولدیغی حالده، مملكتنی تركله، دور دیار ایده رك، كبار مشایخله كوریشمش؛ و شیخ محمد رومیدن طریقت بیرامیه یی اخذ و تلقی ایله، بر مدت حرمینده اقامتدن صكره، مصره انتقال ایده رك، جامع ازهره مداومت ایتمكله، و بعده مصرك شهر و قصبه لرینی طولاشمغه باشلایه رق، نهایت (قلعة الجبال) نام قصبه ده اختیار اقامتله، بر دكان آچه رق، ایپكجیلكله اشتغال ایتمكله باشلامش؛ و بو مناسبتله قزاز تسمیه اولنمشدر. جذبه و حال اصحابندن اولوب، بعض دفعه مزارلرده یاتارمش، مع هذا علم و فضلی و علی الخصوص تصوفدن بهره سی اولوب، بر چوق اقوال حكمیه وموعظه لری، و ((محرقة القلوب فی الشوق العلام الغیوب)) عنوانلی بر رساله سی و ینه تصوفه متعلق دیكر بعض رساىٔلی دخی واردر. ١۰٢٦ تاریخنده وفات ایدوب، مصرده باب الوزیر تربه سنده دفن اولنمشدر.