İbrahim Gazi - ابراهیم غزی

كنیه سی ابو اسحاق اولوب، اشهبی مخلصیله دخی معروفدر. مشاهیر شعرای عربدن اولوب، فلسطین ساحلنده كی غزه شهرنده ٤٤١ تاریخنده طوغمش؛ و شامه رحلتله، اورانك علماسندن اخذ و قراىٔت ایتدكدن صكره، بغداده كیره رك، مدت مدیده مد-

رسۀ نظامیه ده اقامت ایتمش؛ و مدحیه و مرثیه لر نظمنده شهرت بولمشیدی. بعده خراسان طرفلرینه كیدوب، بر خیلی وقت دور وسیاحت، و اورالرده كسب صیت و شهرت ایتمش؛ و نهایت مرودن بلخه كیدركن، ٥٢٤ تاریخنده یولده وفات ایدوب، جنازه سی بلخه نقل و دفن اولنمشدر. شو قطعه جملۀ اشعارندندر : خذ ماصفالك فالحیوة غرور والدهر یعدل تارة و یجور هو مذنب و علاك من حسناته كالنار محرقة و فیها النور بادر فان الوقت سیف قاطع والعمر جیش والشباب امیر صاحب ترجمه بر آره لق شعری ترك ایتمش اولدیغندن، سببنی صورانلره شو قطعه ایله جواب ویرمشیدی : قالوا هجرت الشعر قلت ضرورة باب البواعث والدواعی مغلق خلت البلاد فلا كریم یرتجی منه النوال ولا ملیح یعشق و من العجاىٔب انه لا یشتری ویخان فیه مع الكساد و یسرق