Ahui - آهی

یاوز سلطان سلیم دوری شعراسندن اولوب، اسكی عثمانلی شاعرلرینك اك ممتازلرندندر. روم ایلنده كی نیكبولیدن اولوب، پدری سیدی خواجه نامیله زنكین تاجر اولدیغی حالده، كندیسی پدرینك وفاتنده، اكمال تحصیل مقصدیله استانبوله كله رك، طریق علمی یه ملازمته باشلامش، وبر چوق وقت صكره ((شیرین وپرویز )) نامیله ترتیب ایتمش اولدیغی منظومه منظور حضرت پادشاهی اولدقده، سن ورتبه سنی سؤال بیوروب، قرق یاشنده و هنوز ملازمتده اولدیغی خبر آلنجه، ترقی ایتدیرلمسی فرمان بیوریلوب، بونك اوزرینه آناطولی فاضی عسكری بولنان كمال پاشا زاده بروسه ده كی بایزید پاشا مدرسلكنی عرض ایتمش ایسه ده، آهی روم ایلی قاضی عسكری زیرك زاده نك اغفالیله بو مأموریتی رد ایتدیكندن، خاطر پادشاهی رنجیده اولوب، بسبتون ابواب تفیضی مسدود قالمش؛ و آنجق بر خیلی زمان صكره قره فریه مدرسه سنه تعیین اولنه رق، بو مناسبتله مناسترده ینه شعرادن خاورینك همشیره سیله تزوج ایتمش؛ و بر مدت صكره اوراده رحمت حقه ناىٔل اولمشدر. شو بر قاچ بیت ((شیرین وپرویز)) منظومه سندندر : مكو بر صبح دم بو زال كردون سپهرك دامنن قلمشدی پر خون مكو كیم وضع حمل ایتمشدی ناهیه آنكچون قان ایچنده طوغدی خورشید طوغردی صبح دم بانوی دوران بر آلتون باشلوصرمه صاچلو اوغلان زماننك اكثر شعراسی كبی تشبیهاتده مبالغه ایدوب صدددن چیقدیغی بو بیتلرندن دخی آكلاشیلیور. ((حسن دل )) عنوانیله دیكر بر منظومۀ مشهوره سی وار ایسه ده، اكمالنه وحتی تبییضنه بیله اجل مساعده ایتمدیكندن، نا تمام وپریشان بر حالده قالمشدر. شو بر قاچ بیت بو منظومه دندر : جاهلك فخری جاه و مالله در عارفك عزتی كمالله در

عشق وشوق اهلی وجدوحال ایستر نه كمال ایستر ونه مال ایستر بزی كور كیم نه حالمز واردر نه كمال و نه مالمز واردر. غزلیات وساىٔر اشعاری دخی سلیس و معنیدار اولوب، بر قاچ بیتنك ایرادی مناسب كورلدی : نه مصاحب بولنور درد وغم یار كبی نه فراغت یری وار كوشۀ خمار كبی كوتروب نقطه كبی اورته یه آتدی بنی چرخ بشلدی كندی قیی چزمكه پركار كبی اول قیامت بنی فردایه صالوب آهی ینه یارنه قالدی ایشم وعدۀ دیدار كبی