Avignon - آوينيون

فرانسه نك جنوب شرقیسنده واقع (ووقلوزه) ایالتنك مركزی اولان بر شهردر، كه (رون) ایرماغنك ساحل یسارنده ولیوندن مارسلیایه كیدن دمیر یول خطی اوزرنده، ً١٣ َ٥٧ ْ٤٣ عرض شمالی ایله ً١٥ َ٢٨ ْ٢ طول شرقیده واقع اولوب، ٤١۰۰۰ اهالیسی، بر آقادمیاسی، بر مكتب اعدادیسی، بیوك بر كتبخانه سی، واسع موزه خانه سی، زراعت، تجارت وصنایعه مخصوص آیری آیری جمعیتلری، اوچ خسته خانه سی، بانقه شعبه سی وزراعت صندیغی، كوزل بر تیاترو، بیوك بر پروتستان كلیساسیله بر خاوره سی وساىٔر مؤساتی واردر. (رون) ایرماغنده ایشلین سفاىٔنك مركز اداره سی دخی بو شهرده در. موقع غایت كوزل اولوب، اطرافی باغ وبوستان و دود وزیتون آغاجلریله زمرد آسا واسع بر اووه ایله محاطدر. شمال جهتنده یوكسك بر قیا واردر، كه اوزرنده برعمومی باغچه یاپیلمشد. رون نهری اوزرنده كوزل بر آصمه كوپریسی واردر. سور و استحكاماتی دخی پك متین و كوزل اولوب، اطرافی تفرجكاهلرله احاطه اولنمشدر. ابنیه سی‌علی الخصوص معبدلریله

دواىٔرر رسمیه سی پك كوزل ایسه ده، سوقاقلرك اكثریسی طار وطولاشیقلیدر. صنایع و تجارتی پك ایلری اولوب، جوارلرنده یتیشن ایپك وكوك بویانك تهیۀ واعمالنه مخصوص فابریقه لرله دوكومخانه لری وزراعت ماكینه لریله، صوبه، بیلاردو، آرابه، صندالیه وساىٔر آغاجه متعلق اثاث بیتیه، كاغد، بویا، مقربه و شهریه، كبریت، اجزای كیمیویه، سپت، باصمه، ایپك قماشلر وساىٔره فابریقه لری ودباغخانه لری چوقدر. بوفابریقه لرك محصولات صناعیه سیله اون، شراب، قونیاق، زیتون یاغی، ایپك، بوجكی تخمی، كراسته، سبزه، اسكی بر شهر اولوب، رومالیلرك زماننده (آوینو قاواروم) تسمیه اولنوردی. قرون وسطاده طاىٔفۀ رهبانك اك بیوك مزكزلرندن اولوب، نفوذلری آلتنده بولنوردی، وكلیسا ومناسترلرله طولمشیدی، كه بونلر بو كون دوآىٔر رسمیه وعمومیه یه تحویل اولنمشلردر. ایراندن فرانسه یه التجا و تنصرله بو ایالت خلقنه كوك بویانك زرعنی اوكرتن (ژان آلتن) ك بر هیكلنی یاپوب، شهرك شمالنده كی قیانك اوزرینه ركز ایتمشلردر.