Ayas Paşa - آياس پاشا

یاوز سلطان سلیم حضرتلرینك رجالندن اولوب، دورسلطان سلیمانیده مسند صدارته ناىٔل اولمشدر. كندیسی آرناؤد اولوب، حرم همایوندن آغالقله طشره یه چیقه رق، یكیچری آغاسی اولمش؛ و مصر سفرنده سلطان سلیم حضرتلرینك معیتنده بولنه رق، ابراز شجاعت ودرایتله برابر، بعض اشطارات نافعه نك عرضنه دخی موفق اولمغله، پادشاه مشارالیهك توجهلرینه ناىٔل اولمشیدی. سلطان سلیمانك جلوسندن صكره آناطولی بكلر یكیسی اولوب، شام و الیسی چركس جانبردی غزالینك عصیان وقتلی اوزرینه شام و الیلكنه دخی نصب اولنمش؛ وردوسك فتحنده معیت پادشاهیده بولنوب، پك چوق خدمتی كورلمش؛ واوصره ده بر آره لق غضب پادشاهی یه اوغرایه رق، رتبه سی رفع و كندیسی حبس اولنمش ایسه ده، متعاقباً عفو، ورتبه ومأموریتی اعاده اولنمشدی. بغدان سفرنده وبارباروس خیرالدین پاشا ایله برابر قورفه نك محاصره سنده دخی بولنوب، خدمات مبروره سی كورلمكله، ٩٤٢ تاریخنده وزیر ثانی اولدیغی حالده،

ابراهیم پاشانك یرینه صدراعظم اولوب، درت سنه سورن مدت صدارتنده كمال عدل وحقانیتیله ادارۀ امور دولته موفق اولدیغی كبی، كیمسه یی ده رنحیده ایتمدیكی مشهوردر. ٩٤٦ تاریخنده ظهور ایدن وباعلننه دوچار اولوب، صدر اعظم ایكن وفات ایتمشدر. تواریخده زندوستلغندن بشقه بر عیبی ذكر اولنمیور. ازواج و مفروشه لری چوق اولوب، وفاتنده یكرمیدن زیاده اولاد براقمشدر. مسقط رأسی آرناؤدلغك نره سی اولدیغنه داىٔر بر معلوماته دسترس اولنه مدیسه ده، برادرلرینك علمادن اولوب آولونیه ده مقیم بولنمش اولدقلری بعض تاریخلرده ذكر اولندویغنه نظراً او طرفلردن نشأت ایتمش اولمسی‌ ملحوظدر.