Agathocle - آغاتوقلیس

سیچلیا حكمداری اولوب، میلاددن ٣٦١ سنه اول جزیرۀ مذكوره نك (ترن) شهرنده طوغمش؛ وپدری كرمیتجی ایكن، كندیسی عسكر یازیلوب، قوماندانلق رتبه سنه ناىٔل اولمش؛ وقبل المیلاد ٣١٧ تاریخنده بر حیله ایله سیراقومه شهرینی ضبط ایله دیونی لغو ومنع ایده رك، اراضی یی اهالی یه مساوات اوزره تقسیم ایتمش؛ وسیچلیانك اكثر طرفلرینی ضبط ایتمش اولان قارتاجلیلره اعلان حرب ایدوب، كندیلرینی جزیره دن اخراجه وبتون سیچلیایی كندی اداره سنه آلمغه موفق اولدقدن صكره، آفریقایه دخی چكوب، قارتاجلیلرله محاربه ایتمش ایسه ده، مؤخراً تبعه سی ظلمنی چكه میوب اختلال ایتدكلرندن، قارتاجلیلردن استمداده مجبور اولوب، مقابلةً سیچلیاده كی مستملكات قدیمه لرینی اعاده ایتمكه مجبور اولمش؛ و او صره ده تورونی (آرخاغات) طرفندن بالتسمیم، قبل المیلاد ٢٨٩ تاریخنده ٧٢ یاشنده وفات ایتمشدر. قارتاجلیلره قارشی آفریقایه سوق عسكر ایتدیكی وقت، عسكردن عودت امیدینی رفع ایله، غالبیته تحریص ایچون، كمیلرینی یاقمش اولدیغی مرویدر. طارق بن زیاد دخی اندلسه چكدیكی وقت بویله یاپمشدر. (وولتر) (آغاتوقلیس) ی مبنی علیه اتخاذ ایده رك بر تیاترو كتابی یازمشدر، كه بوقبیلدن اوله رق، صوك اثریدر.