Ağa Hüseyin PAşa - آغا حسين پاشا

یكیچری اوجاغندن یتیشه رك، سلحدار علی پاشانك سوقیله، یكیچری آغالغنه قدر ترقی ایتمش، ومؤخرأ وزارتله بوغاز محافظلغنه نصب اولنمشیدی. یكیچری اوجاغنك لغو ورفعی وقعه سنده پك چوق خدمتی كورلمكله، ١٢٤١ تاریخنده سرعسكر لك مسندی ایجاد اولندیغنده، برنجی اوله رق سرعسكر اولمش؛ و ١٢٤٣ ده سرعسكرلكدن عزل، ویرینه خسرو پاشا نصب اولنه رق، كندیسی ادرنه والیلكنه تعیین اولنمشیدی. ١٢٤٧ تاریخنده، مصر وقعه سنك ظهوری اوزرینه، سردار اكرم اولوب، حلب اوكنده انهزامی وقوع بولمغله، یرینه رشید پاشا تعیین اولنه رق، انفصال ایتمشدر. مؤخراً بر قاچ دفعه ودرین والیلكنه تعیین اولنوب، اون سنه قدر ودین ایالتنی اداره ایتمش؛ و ١٢٦٥ تاریخنده ودین والیسی ایكن ارتحال داربقا ایدوب، شهر مذكورده دفن اولنمشدر. هر نه قدر امی ایدیسه ده، كار آزموده وشجیع بر آدم اولوب، علی الخصوص یكیچری وقعه سنده كی خدمتی حسبیله، عمومك حرمتنه ناىٔل اولمشیدی. عمرینك صوك سنه لرنده كوزلرینه عمی طاری اولمش ایدو كی مرویدر.