Argolide - آرغولیدە

یونانك موره شبه جزیره سنده بر قطعه سیدر، كه (قورنته) ایله برابر بر ایالت تشكیل ایدیور. آرغولیده مع قورنته ایالتی بش قضایه منقسم اولوب، بونلرده : ناوپلیا، آرغوس، قورنته، (اسپچا) مع (هرمونیس) و (هیدرا) مع (كیتیره) قضالریدر. ایالت مركزی ناوپلیا شهری اولوب، اصل آرغولیده ناوپلیا كورفزیله اكینه كورفزی آره سنده شرق جنوبی یه ممتد برشبه جزیره دن عبارتدر، كه شمال غربی جهتنده دخی ایالتك قسم دیكری اولان (قورنته) قطعه سی بولنوب، قورنته كورفزینك سواحل جنوبیه سنه قدر ممتد اولور. ایالت قره طرفندن غرباً (آخاىٔیا) وغرب جنوبی جهتندن (آرقادیا) ایالتلریله محدود، وشمال شرقی طرفندن قورنته برزحنده آتیقه ایالتنه ملاصقدر. اراضیسی موره نك ساىٔر طرفلری كبی طاغلق اولوب، پك منبت متعدد دره ووادیلری دخی واردر. باشلیجه قصبه لری ناوپلیا، آرغوس، قورنته، قاستری َوپورو شهرلریدر. ایالتك اهالیسی ١٢٧٨۰۰ نفوسدن عبارت اولوب، بر قسمی وعلی الخصوص ساحل وآطه لرك اهالیسی آرناؤد جنسنه منسوبدر. _ آر-

غولیده اك اسكی زمانده (پلاسج) دنیلن قومك مسكنی اولوب، آرغوس شهرینك یانیسی اولان (ایتاخوس) ك نسلندن كلن حكمدارلرك النده ایدی. میلاددك ١٦ عصر اول مصردن (بلوس) ك اوغلی (داناؤس) اسمنده بر آدم كلوب، پلاسجلری مملكتدن اخراجله ((بلو سیلر)) سلاله سی حكومتنی تأسیس ایتمش؛ وبوسلاله دن (آباس) ك وفاتنده، آرغولیده بونك اوغللری بیننده تقسیم اولنه رق، بر قاچ حكومته منقسم اولمشیدی، كه اك اهمیتلیسی (آرغوس) حكومتی اولوب، بو شهرده تروآ محاربه سی زماننده (آغاممنون) حكمدار ایدی. قبل المیلاد ٨٢۰ تاریخنده حكمدارلق لغو اولنه رق، بر قاچ رىٔیسك ریستی آلتندن بر نوع جمهوریت تشكل ایتمش؛ و ٦۰۰ تاریخندن صكره مملكت بر چوق وقت اسپارطه لیلرك ضبطنده بولنمش؛ وقبل المیلاد ٢٣٣ تاریخنده (آخاىٔیا) هیىٔت اتفاقیه سنه داخل اولان اقطار ساىٔره ایله برابر رومالیلرك الینه چكمش؛ واوندن صكره قسطنطینیه قیصرلرینه، اهل صلیب فرنكلرینه ووندیكلیلره چكه رك، نهایت دولت عثمانیه نك قبضۀ تصرفنه كیرمكله، یونانك استقلالنه دكین ممالك عثمانیه دن بولنمش؛ ویونان دولتنك تشكیلنده (قورنته) ایله برابر برایات اعتبار اولنمشدر.