Arbanya - آربانیا

یاخود (آربریا) ، آرناؤدلغك آرناؤدلر طرفندن ویریلن اصل اسمیدر، كه بونی كیغه لر (آربانیا) و طوسقه لر (آربریا) تلفظ ایدرلر. آوروپالیلر عندنده مستعمل اولان (آلبانیا) اسمی، كه اشتقاق وسبب وضعیله بتون اوروپا مؤلفلرینی یورمش اولدیغی حالده، هر بری بردرلو فرضیات دورادو رانه یه قالقیشوب، كیمسه اصل و حقیقتنی بولمغه موفق اوله مامشدر، اشبو (آربانیا) كلمه سندن مأخوذدر. روملر (ب) حرفنی تلفظ ایده مد كلرندن ، بونی (آروانیا) صورتنده تلفظ ایدوب، اهالیسنه دخی (ن) و (و) ك تقدیم وتأخیریله (آرناؤد) كلمه سنك اصل واشتقاقی بو اولدیغی حالده، بونك اصلنی عربی وفارسیده آرایوب، (( عارنبود )) ویاخود (( عارلنا ان لعود)) كبی كولنج اشتقاقلره قالقیشمق عبشدر. هرنه قدر كه بو كونكی كونده (( آرناودلق )) معناسیله آرناؤدلر عندنده (اشكیپریا) تعبیری دها عمومیت اوزره مستعمل اولوب، (آربریا) اسمی طوسقه لغك آولوینه جوارلرینه تخصیص اولنمش ایسه ده، آرناؤدلق معناسیله دخی قوللانیلوب، علی الخصوص برقاچ عصردن بری آرناؤدلغك خارجنده یعنی ایتالیا، یونان، مرمره وساىٔر طرفلرده یاشامقده بولنان آرناؤدلر عندنده

(اشكیپریا) اسمی بسبتون مجهول اولوب، بونلر آرناؤدلغی عمومیت اوزره (آربانیا) ویا (آربریا) نامیله یاد ایتمكده درلر. وجه تسمیه یه كلنجه : (( آر)) آرناؤدجه تارله دیمك اولوب، ((بان)) كلمه سی دخی ، فارسیده ده اولدیغی كبی، یاپیجی دیمك اولدیغندن، (آربان) دیمك چفتجیلك صنعتنی ادخال ایدنلر آسیای وسطیدن هجرت ایدن اقوام آریه اولدیغی، وآرناؤدلرك دخی بو اقوامك اك قدیملرندن بولندقلری محققدر. حتی ساىْر السنۀ قدیمۀ آریه ده دخی (( آر )) یاخود (( آغر )) ویا (( آرغ )) كلمه سی تارله دیمك اولمغله، بو اقوامك عمومنه ویریلن (آریا) اسمی بو كلمه دن مشتق اولدیغی كبی، اقوام مذكوره دن اكثریسنك اسمی دخی بو كلمه ایله مركب اولدیغنی علم اللسان علماسندن موسیو (ماقس مولر) اثبات ایدیور، كه بوده مدعامزی تأ كید‌ ایدر بر سند قویدر. طوسقه لرك غنه لی الفلری اولمدیغی كبی، (ن)‌ حرفنی دخی اكثریا (ر) یه تحویل‌ ایتمك لسانلرینك اقتضاسندن اولمغله، (( آربان ))‌ كلمه سنی ((آر بر)) صr