Araukanic - آراوقانیا

آمریقای جنوبیده (شیلی) نك جنوب طرفنده بر مملكتدر، كه شمالاً (قو نسپسیون) شهرینك و ( بیو بیو) نهرینك بر آز جنوب طرفندن باشلایه رق، و بعده تا (آند) سلسلۀ جبالنك صرتنه قدر (بیو بیو) مجراسیله شیلیدن آیریله رق، جنوباً ( والدیویا) نهرینه قدر ممتد اولور. شمالدن جنوبه طوغری اولان بویی َ ٣ درجه یعنی ٤۰۰ كیلومتره در. شرقاً حدودی ( آند) سلسلۀ جبالنك صیرتیله محدود اولدیغی كبی، غرباً دخی ساحله قریب اولان طاغلره قدر ممتد اولوب، سا

حلك بوینجه طار بر اراضی شیلینك النده بولنیور. و بو دولتك دها جنوبده كی ممالكیله اختلاطنی تأمین ایدیور. شرقدن غربه اولان اكی ١٦۰ و نهایت ١٨۰ كیلومتره اولوب، سطحی دخی آلتمش یتمش بیك مربع كیلومتره ایسه ده، اهالیسی یتمش سكسان بیك كشیدن عبارتدر. مملكت طاغلق اولوب، بر چوق نهرلر آقار، و آلچق یرلرله یایرلرده پك چوق نباتات یتیشیر. آغاجلری چوق اولوب، علی الخصوص ٢٥ متره ارتفاعی اولان بر نوع آق كولكن بولنور، كه بونك یاریسی طالسز و دوز بر كوتو‌كدن عبارت اولوب، كراسته ایچون پك اییدر. آر اوقانلر طاغنیق بر حالده یاشایوب، اسپانیوللرك اثنای فتحنده تأسیس ایتمش اولدقلری قلعه لری دخی هدم ایتمش اولدقلرندن، بونلردن‌ یالكز (آراوقو) قلعه سی باقی قالمشدر، كه اوده شیلینك ضبطنده در. آر اوقانلر بر چوق قبیله لره منقسم اولوب، هر قبیله دخی عاىٔله لره تقسیم اولنور. و هر عاىٔله نك كندینه مخصوص اراضیسی وحدودی اولوب، بو سببدن طولایی اولری دخی بربرلرندن غایت اوزاق، واكثریا اورمانلرك ایچنده مختفیدر. هر قبیله نك بر رىٔیس اولوب، بو ریاست دخی ارثاً انتقال ایدر. (قاسیق) تعبیر ایتدكلری بو رؤسانك فوقنده وقتیله، بری جسمانی ودیكری رومانی اوله رق، (توكی) و (ولمن) ناملریله ایكی رىٔیس عمومیلری دخی وار ایدی، كه قاسیقلر طرفندن انتخاب اولنورلردی. آنجق بو كونكی كونده قاسیقلرك فوقنده كیمسه بولنمیوب، قاسیقلر بسبتون مستقل بولندقلری جهتله، آراوقانیا بر چوق مستقل كوچك حكومتلردن عبارت كبی قالوب، بناءً علیه اتحاد وقوتلری قالمامشدر. آر اوقانلر آوجیلق وزراعتله مشغول اولوب، مملكتده مصر بغدایی، بقله، یر الماسنك انواعی، بر نوع بو بر واوروپادن نقل اولنان محصولاتك انواعی یتیشیور. صیغیر وقویو نلری دخی زیاده اولوب، اتلری زیاده سیله لذیذدر. كثرت اوزره بولنان كوللردن بالیقلرك انواعی چیقار.