İbni Hanii - ابن هانیء

(ابو القاسم محمد _ ازدی) اندلسك اعاظم شعراسندن اولوب، پدری افریقیه ده كی مهدیه شهرندن اولدیغی حالده، اندلسه هجرت ایتمش؛ و صاحب ترجمه اشبیلیه ده طوغمش، و اوراده نشأت ایتمشدر. شعر و ادبیاتده اندلس ادباسنك كافه سنی چكمكله، متنبینك معاصری اولمق مناسبتیله، ((متنبی الغرب)) تسمیه اولنمشیدی. دیوان‌ اشعاری بیوك اولوب، اشعاری حقیقةً غایت سلیس و بلیغ ایسه ده، مدحده مبالغاتی چوقدر. فلاسفه مذهبنه ماىٔل اولدیغندن، حامیسی اولان اشبیلیه صاحبی كندیسنی كروه متعصبینه قارشی مدافعه ایده میوب، اونك سببندن كندیسی دخی هدف اعتراض اولمغله، صاحب ترجمه یه بر مدت سیاحت ایتمسنی اخطار ایتمش؛ وبونك اوزرینه ابن هانی افریقیه ده كی (زاب) خطه سنه كیدوب، اورانك صاحبنه انتساب ایتمش؛ و بر مدت صكره صیت و شهرتی عالمكیر اولمغله، معز طرفندن مصره دعوت اولنه رق، كیدركن ٣٦٢ تاریخنده بر قه ده مقتولاً وفات ایتمشدر. و طنندن چیقدیغنده ٢٧ و وفاتنده ٣٦ یاشنده ایدی. شو بر ایكی بیت جملۀ اشعار رقیقه سندندر : فتكات طرفك ام سیوف ابیك وكىٔوس خمرك ام مراشف فیك عیناك ام مغناك موعدنا علی وادی الكری القاك ام وادیك