İbnil Verdi - ابن الوردی

(سراج الدین ابو حفص قاضی عمر بن مظفر) مشاهیر ادبادن و فقهاء شافعیه دن اولوب، ٦٩١ تاریخنده معرة النعمانده طوغمش، و ٧٤٩ ده وفات ایتمشدر. ابو الفدانك مشهور تاریخنه بر ذیل ایله‌ جغرافیایه متعلق ((خریدة العجاىٔب)) عنوانیله بر كتاب یازمشدر، كه ١٢٧٦ تاریخنده مصرده طاش باصمه سیله طبع اولنمشدر. دیكر آثاری دخی وجه آتی اوزره در : ((البهجة الوردیة))، ((فواىٔد فقهیة)) منظوم، ((شرح الفتة ابن مالك))، ابن معطینك الفیه سنه شرح اوله رق ((وضؤ الدرة))، ((قصیدة اللباب فی علم الاعراب))، ((شرح قصیدة اللباب))، ((اختصار ملحة الاعراب))، ((المساىٔل المذهبه فی المساىٔل الملقبه))، ((ابكار الافكار))، ((ارجوزة فی تعبیر المنامات))، ((ارجوزة فی خواص الاحجار))، ((منطق الطیر)) منظوم، ((لامیة ابن الوردی)) عنوانیله مشهور بر قصیده سی، و ((مرثیه ابن البارزی)) عنوانیله بر مرثیه سی دخی واردر.