İbni Zeydün - ابن زيدون

(ابو الولید احمد بن عبدالله مخزومی) اندلسك مشاهیر ادباسندن اولوب، ٣٩٤ تاریخنده قرطبه ده طوغمش؛

و طواىٔف ملوكدن ابواحزم بن جهوره انتساب ایده رك، وزیری اولمغله، ساىٔر اندلس ملوكی نزدینه سفارتله كوندیله رك، امور سیاسیه و علوم وادبیاتده كی مهارت فوق العاده سیله شهرت بولمشیدی. بعده ابو الحزمك غضبنه اوغرایه رق، حبس اولنمش ایسه ده، فرار یولنی بولوب، اشبیلیه یه انتقال ایتمش؛ و اورانك حاكمی معتضد طرفندن وزیر اتخاذ اولنه رق، مؤخراً بونك خلفی اولان معتمد طرفندن دخی وزارتده ابقا اولنمش؛ و ٤٦٣ ده اشبیلیه ده وفات ایتمشدر. مرتب دیوانی واردر. اندلس ملوك امویه سنك اخیری اولان مستكفی بن مستظهرك قیزی (ولاده) غایتله عالمه، ادبیه، شاعره و فوق العاده بر حسن و جمال و صوت حسنه مالكه اولمغله، پدرینك نكبتندن صكره، شعرا و ادبا و ساىٔر اكابر له مصاحبت و مشاعره ایتمكله باشلامش اولدیغندن، كندیسنه تعشق ایدنلرك بری ده صاحب ترجمه اولوب، بو عشق و علاقه سیله شهرت بولمش؛ و اكثر اشعارینی بونك حقنده سویلمشدر. ولاده نك جملۀ عشاقندن بری اولان ابو عامر بن عبدوس مومی الیهایی ساىٔر عشاقندن چكه رك، كندینه تخصیص ایتمكله تشبث ایتدیكنده، ابن زیدون معشوقه سنك آغزندن رقیبنه بر رساله یازمشیدی. كه فصاحت و بلاغتیله مشهور اولوب، اكثر ادبا طرفندن شرح اولنمشدر. بو شرحلرك اك مكملی (ابن نباته) نك ((سرح العیون فی شرح رسالة ابن زیدون)) عنوانلی شرحی اولوب، ١٢٧٨ تاریخنده مصرك بولاق مطبعه سنده طبع، لسانمزه دخی ترجمه ن نشر اولنمشدر. ابن زیدون بلنسیه ده بولندیغی صره ده، ولاده یه اولان شوق و اشتیاقنی مصور اولمق اوزره، سویلمش اولدیغی شو قطعه جملۀ اشعارندندر : غریب بارض الشرق یشكر للصا تحملها منه السلام الی الغرب وماضر انفاس الصبا فی احتمالها سلام فتیً یهدیه جسم الی قلب