İbni Sekit - ابن سكیت

(ابو یوسف یعقوب بن اسحاق) اعاظم ادبا و علم لغت اىٔمه سندن اولوب، متوكلك ندیمی و اوغللری معتز و مؤیدك مربیسی ایدی. كندیسی مفضله دن اولوب، حضرت علی و اهل بیت نبی یه فوق العاده محبتی اولدیغندن، بر كون متوكلك اوغللرینی اوقوتمقده ایكن، خلیفه ((بو ایكی اوغلمی می زیاده سویورسك، یوقسه حس ایله حسینی می ? )) دینجه، ابن سكیت ((حضرت علینك كوله سی اولان قنبری بیله ایكی اوغلكله و سنكله دكشیدیرمم)) دیدیكیچون، متوكلك امریله دیلی قوپاریلوب، ٢٤٣ تاریخنده وفات ایتمشدر. لغت وادبیات وساىٔره یه داىٔر پك چوق آثاری اولوب، اك مشهورلری شونلردر : ((اصلاح المنطق))، ((كتاب الالفاظ))، ((كتاب معانی الشعر الكبیر))، ((كتاب معانی الشعر الصغیر)) ((كتاب سرقات الشعرا))، ((كتاب فعل و افعال)) ، ((كتاب الحشراب)) ، ((كتاب الاصوات))، ((كتاب الزبرج))، ((كتاب الامثال))، ((كتاب المقصور و الممدود))، ((كتاب المذكر و المؤنث))، ((كتاب الاجناس)) ، ((كتاب الفرق))، ((كتاب السرج و اللجام))، ((كتاب الوحوش))، ((كتاب الابل))، ((كتاب النوادر))، ((كتاب الاضداد))، ((كتاب الشجر و النبات))، ((كتاب القلب و الابدال))، شو قطعه جملۀ اشعارندندر : و من الناس من یحبك حبا ظاهر الحب لیس بالتقصیر فاذا ما سألسته عشر فلس الحق الحب باللطیف الخبیر