İbni Said Müğrebi - ابن سعيد مغربی

(ابو الحسن نورالدین علی بن موسی) اندلسك اعاظم ادبا و شعراسندن اولوب، عمرنده ایتدیكی اوزون سیاحتلری مصور سیاحتنامه لریله مشهوردر. ٦١۰ تاریخنده غرناطه ده طوغوب، اشبیلیه ده اكمال تحصیل ایتدكدن صكره، ابتدا اندلسك هر طرفنی كزمش؛ و بعده آفریقانك سواحل غربیه سی طریقیله شرقه رحلت ایده رك، مصر و شام و عراق و حجاز اقطارنده ایكی دفعه سیاحت ایتمش؛ و هر مملكتك اكابر و علماسیله كوریشمشدر. سیاحتنامه لری كوردیكی مملتلرك او صاف و احوالنی مصور اولمغله، فن جغرافیا نقطۀ نظرندن اهمیتلری دركار اولوب، غرب طرفلرینك احوالنی مبین اولان سیاحتنامه سنی ((المغرب فی حلی المغرب)) ، ((و شرق جهتلرینك احوالنی مصور اولاننی ((المشرق فی حلی المشرق))، و تونسدن شرقه اولان ایكنجی سیاحتنی مبین اولان سیاحتنامه سنی دخی ((عدة المستجز و عقلة المستوفز)) تسمیه ایتمشدر. حجازه اولان سیاحتنی دخی ((النفحة المسكیه فی الرحلة المكیه)) عنوانیله آیریجه بر سیاحتنامه صورتنده یازمشدر. بو سیاحتنامه لردن بشقه ((المرقصات و المطربات))، ((المقتطف من ازاهر الطرف))، ((الطالع السعید فی تاریخ بنی سعید)) و ((الزرمه)) عنوانلریله درت كتابی و ساىٔر بعض آثاریله بر چوق اشعاری واردر. ٦٨٥ تاریخنده تونسده وفات ایتمشدر. شو بر قاچ بیت غرناطه یه اولان شوق و اشتیاقنی مصور بر قصیده سندندر : اغشنی اذا غنی الحمام المطرب بكأس بها و سواس فكری ینهت و مل میلة حتی اعانق ایكة و الثم ثغراَ فیه اللضب مشرب و لم ار مرجاناً و دراً خلافه یطیف به ورد من الشهد اعذب