ابرهة الاشرم

Osmanlica ansiklopedi kamus alemde ابرهة الاشرم maddesi. Sayfa:589


Ebreheteleşram - ابرهة الاشرم

حضرت فخر كاىٔنات افندمزك ولادت سعادتلری زمانلرنده یمنده حكم سورن حبشه دن اولوب، ابتدا نجاشی طرفندن یمنك ضبطنه كوندریلن (ارباط) ك رفیق و معاونی ایكن، بینلرنده واقع اولان اختلاف اوزرینه، آمرینی قتل ایله، یمنی كندیسی ضبط ایتمش؛ و ابتدا نجاشی یی دلكیر ایتمش ایسه ده، بعده بر طاقم هدایا ارسالیله كوكلنی آلمش؛ و یمنده انواع مظالم اجراسنه باشلامشیدی. حتی (یزن) اسمنده برینك زوجه سنی جبراً آلوب، كندیسی تزوج ایتمش؛ و بو قادینك ایلك قوجه سندن متولف اولان مشهور (سیف بن یزن) بونك تربیه سنده بیومشدر. صاحب ترجمه، یمن عربلرینی كعبۀ مكرمه یه ایفای حجدن منع ایتمك ایچون، صنعاده مكمل و مصنع بر كلیسا بنا ایده رك، خلقی بونك زیارتنه دعوت ایتمش ایسه ده، كعبه دن روكردان اوله مدقلرینی كورنجه، كعبه نك تخریبتی قوروب، عسكرینی تجهیز و بر طاقم فیللر سوق ایتمش؛ و قبیلۀ قریش مقاومتدن عاجز قاله رق، بیت اللهی جناب حقك محافظه سنه تودیعله طاغلره چكلمشلردی. ابرهه عسكریله‌ و فیللریله كعبه نك اوزرینه هجوم ایتمكده ایكن، من طرف الله ابابیل قوشلری ظهور ایله، آتدقلری كوچك طاشلرله عسكرینی اتلاف ایتمشلر؛ و كندیسی دخی بو طاشلرك برینه مصاب اولمغله، اتلری دوكیله رك، یمنه عودت ایدوب، تلف اولمش، قرآن كریمده اصحاب فیل نامیله ذكر اولنان طاىٔفه صاحب ترجمه ایله عسكریدر. سوق ایتدیكی فیللردن اك بیوكنك اسمی (محمود) ایدی. مورخینك بعضیسی ابرهة الاشرم ایله ابرهه بن صباحك بر شخص اولدیغنی ادعا ایتمشلردر.

Kamusul Alamde Ebreheteleşram maddesi, ابرهة الاشرم osmanlica tarih ve cografya ansiklopedisi Ebreheteleşram nedir anlami. hakkinda bilgi



7 14 21 28 35 42 49 56 63 70 77 84 91 98 105 112 119 126 133 140 147 154 161 168 175 182 189 196 203 210 217 224 231 238 245 252 259 266 273 280