İbrahim Keleşni - ابراهيم كلشنى

كبار مشایخدن و پیران طریقتدن بر مرد خدا اولوب، طقوزنجی قرن هجری اواسطنده آذر بایجانده دنیایه كلمشدر. سلسلۀ نسبی پدری طرفندن آلتی بطنده لسان تركیده واضع اللغه اولان اوغوز آتایه، و والده لری طرفندن حضرت امام علی یه منتهی اولور. بر مدت پدرینك داىٔرۀ تعلیم وتربیه سی ایچنده بولندقدن صكره، تبریزه كیده رك، سید یحیای خلوتی خلفاسندن دده عمر روشنی خدمتنه كیرمش، وبو ذاتك ارشاد ودلالتیله تنویر باطن و كسب كمالات معنویه ایتدكدن صكره، سجاده نشین ارشاد اولمشیدی. شاه اسماعیل صفوی ظهور ایله ایرانده شیعیلكی اعلان ایتدیكنده، صاحب ترجمه و طننی تركله، مصره رحلت ایده رك، قاهره نك قبة المصطفی نام محلنده اختیار اقامت ایتمشیدی. یاوز سلطان سلیم خان حضرتلری مصری تسخیر ایتدكلری اثناده، شیخ حضرتلرینه فوق العاده حرمت ورعایت ایتمش، و مؤیدیه قارشیسنده كی محل معروفی هبه و تملیك ایلمشلر ایدی. ٩٢٦ تاریخنده مریدان و محبانك امداد و اعانه سیله محل مذكوره ده تكیه سنك بناسنه مباشرت ایده رك، ٣١ سنه سنده اكمال ایتمشدر. مصر دیارنده بر درجه ده شهرت بولمشلردی، كه و عظ و ذكری مجلسلرینه طوپلانان ارباب ارادتك حد و حسابی یوغیدی. بعده قانونی سلطان سلیمان حضرتلری كندیلرندن درسعادته قدوملرینی التماس ایتمكله، ٩٣٥ تاریخنده استانبوله كلوب، مجلس خاص حضرت پادشاهی یه داخل اولمغله، فوق العاده اعزاز و اكرامه ناىٔل اولمش؛ و مصره عودتله، ٩٤۰ سنه سنده عازم جنان اوله رق، زاویه لری جوارنده تربۀ محصوصنه دفن اولنمشدر. علوم نقلیه ده و علی الخصوص تفسیر و حدیث و تصوف و علم كلامده ید طولی صاحب اولوب، علم و فضلی دخی

كرامات و مقامات و احوال باطنیه لری كبی حد كاله واصل ایدی. حضرت مولانای رومینك ((مثنوی)) سنه نظیره اوله رق، ((معنوی)) عنوانیله‌ قرق بیك بیتدن عبارت بر كتاب حكمت نصابی، ابن فارضك مشهور ((قصیدۀ تاىٔیه )) سنه بر نظیره سی، عارفانه بر دیوانی وساىٔر بعض منظومه لری واردر.