Ebşir Paşa - ابشير پاشا

اسمی مصطفی اولوب، سلطان محمد خان رابع حضرتلرینك زمان سلطنتلرنده ١۰٦٤ تاریخنده ایكی آی صدارت ایتمشدر. كندیسی جلالی آبازه پاشانك اقرباسندن اولوب، سرای همایونه دخول ایله قطع مراتب ایده رك، میرآخورلق رتبه سنه ناىٔل اولمشیدی. بعده بودین و ١۰٥٦ تاریخنده شام والیسی اولمشیدی. او صره ده عصیان ایتمش اولان درزیلری مغلوب ایتمش ایسه ده، تربیه ده زیاده شدت كوستردیكندن، حلبه، و اورادن سیواس و آناطولی و الیلكنه نقل اولنمش؛ و اوراده دخی اجرای ظلم و تعدی ایتمكله برابر، وعصیان ایتمش اولان آبازه حسن آغایه دخی معاونت ایتدیكندن، ینه حلب و الیلكنه ارجاع، و ١۰٦٤ سنه سی ذی الحجه سنده صدارت عظمایه نصب اولنمق اوزره، درسعادته جلب اولنوب، بر طاقم عونه جمعیچون یولده درت آی ضایع ایده رك، ١۰٦٥ سنه سی ربیع الآخرنده اسكداره مواصلت، و فوق العاده بر آلای ایله استانبوله دخول ایتمشدر. كندیسنه او صره ده عایشه سلطان تزویج اولنه رق، صهریت شهریاری شرفنه دخی ناىٔل اولمشدر. جمع ایتمش اولدیغی اشرار آرزولرینه كوره یوزكورمینجه، صاحب ترجمه نك دشمنلری اولان یكیچریلرله بالاتفاق، ابشیر پاشانك اعدامنی مصرانه ایستملكله، اولبابده فرمان صادر اولوب، رجبك دردنده اعدام اولنمشدر. قیصه بویلی، امی، جاهل، ظالم و مع هذا زیاده سیله مراىٔی و صوفی مشرب بر شخص ایدی.