Austrasia - آوستراسيا

آلمانجه ((شرق دولتی )) دیمك اولان (اوستر ریخ) كلمه سندن مأخوذدر. قرون وسطاده آوروپاده (فرانق) اسمیله ظهور ایتمش اولان قومك تشكیل ایتمش اولدقلری دولتلردن اولوب، اسكی (مج) قراللغنی (یعنی لورن) ایله شامپانیانك بر قسمنی، اسكی تورینغ قراللغنی (یعنی انقونیایی) . آلمانیا دوقه لغنی (یعنی آلساس، باده و وورتمبرغی) و باویره ایله فریزه دوقه لقلرینی جامع ایدی. حكمدارلرینك فتوحاتنه كوره بو حدود توسع دخی ایتمشیدی. بو دولت میلادك ٥١١ تاریخنده عموم فرانقلر حكمداری قلوویسك وفاتی اوزرینه، ملكنك درت اوغلی بیننده مقاسمه اولنمسندن ظهور ایدوب، مرقوموندن (تیری) نك حصه سنه اصابت ایتمش، و مح شهری پایتخت اتخاذ اولنمشیدی. بونك نسلندن اون حكمدار كلوب، وجه آتی اوزره حكومت سورمشلردر : تیری من ٥١١ الی ٥٣٤ میلادی برنجی تىٔودبرت )) ٥٣٤ )) ٥٤٨ )) تىٔودباسد )) ٥٣٨ )) ٥٥٥ )) برنجی سیبرت )) ٥٦١ )) ٥٧٥ )) برنجی شیلدبرت )) ٥٧٥ )) ٥٩٦ )) ایكنجی تىٔودبرت )) ٥٩٦ )) ٦١٣ )) ایكنجی تیری )) ٦١٢ )) ٦١٣ )) ایكنجی قلوتر )) ٦١٣ )) ٦٢٢ )) برنجی داغوبرت )) ٦٢٢ )) ٦٣٨ )) ایكنجی سیجبرت )) ٦٣٨ )) ٦٥٦ )) ایكنجی شیلدبرت )) ٦٥٦ )) ٦٧٣ )) بو آره لقده آوستراسیا ایكی دفعه فرانسه دولتنه الحاق اولنمشدر. برنجی الحاقی برنجی قلوترك زماننده اولوب، ٥٥٥ دن ٥٦١ تاریخ میلادیسنه دك سورمشدر. ایكنجی الحاقی دخی ایكنجی قلوتر ایله داغوبرتك زمانلرنده اولوب، ٦١٢ دن ٦٣٨ تاریخنه

دك دوام ایتمشدر. ٦٧٩ تاریخنده ایكنجی داغوبرتك وفاتنده بروقتدن بری ینه فرانسه یه الحاق ایدلمش اولان آوستراسیا اهالیسی اختلال ایدوب، هریستاللی (پپین) ی و الی انتخاب ایتمشلردر. بونك اوغلی (شارل مارتل) ٧١٤ تاریخ میلادیسنده پدرینه وارث اولوب، آوستراسیایی نو ستراسیا خكمدارلرینه قارشی مدافعه ایتمش؛ و اسماً حكمدارلق ایدن دردنجی تیری زماننده بتون فرانقلر دولتنك صاحب مستقلی اولمشدر. شارل مارتلك وفاتنده آوستراسیا (قصیر پپین) ك برادری (قارلومان) ك حصه سنه دوشمش ایسه ده، مرقوم راهب اولمغله، ملكنی برادرینه ترك ایتمش؛ و بو وجهله مرقوم پپین ٧٥٢ تاریخ میلادیسنده بتون فرانقلرك حكمداری اولوب، او وقتدن بری آوستراسیا اسمی رفع اولنمشدر.