Ak şemseddin - آق شمس الدين

(شیخ _ محمد بن حمزه) ابو الفتح سلطان محمد خان ثانی حضرتلری دور سلطنتلرینك علما ومشایخندن اولوب، كبار اولیاء اللهدن معدوددر. دمشقده تولد ایدوب، صبی ایكن پدریله برابر دیار رومه كله رك، تحصیل علمه قویلمش؛ وذكاوت واستعداد فوق العاده سی یاردمیله آز مدت ظرفنده اكماك علوم متداوله ایده رك، وحتی علم طبی دخی اوكرنه رك، عثمانجق قصبه سنده مدرس اومشیدی. بووجله علوم ظاهریه یی اكمال ایتدكدن صكره، علوم باطنیه هوسنه دوشب، طریقت صوفیه یه ماىٔل اولمغله، بعض ذوات اودورك كبار مشایخندن حاجی بیرام ولی حضرتلرینه انتشابی توصیه ایتمشلر ایسه ده، ولی مشارالیه محتاجین ومدیونلره توزیع ایتمك اوزره پاره دیلنمكی وفقرا ومحبوسینك ایشلریچون اوته بری یه

قوشوب خدمت ایتمكی اعتیاد ایتمش بر مرد درویش مشرب اولدیغندن، آق شمس الدین حضرتلری بوطور وحالنی اوته دنبری بكنمیور، وعلوم ظاهریه ومدرسلك پایه سنك ویردیكی غرور بویله بر درویشك خدمتنه تنزله مانع اولیوردی. بناءً علیه حلبده كسب اشتهاد ایدن شیخ زین الدین خافی یه انتساب ایتمك اوزره، او طرفه عزیمت ایتمش ایسه ده، حلبه وصولنده رؤیاسنده بیوننده برزنجیر الدیغنی وبو زنجیرك اوجنی حاجی بیرام ولی طوتوب چكدیكنی كورنجه، اویانیر اویانماز، همان دیار رومه عودت ایتمك اوزره، یوله چیقه رق، آنقره یه وصولنده، حاجی بیرام حضرتلرینی مریدلریله برابر اوراق بیچمكله مشغول بولوب، شیخ كندیسنه اصلا التفات ایتمدیكندن، بوده مریدلره قاتیله رق، اوراق بیچمكله باشلامش؛ وایشدن فارغ اولنجه، شیخ یمك حاضرلیوب، كوپكلره ده آیریجه یمك ویرمش، وآق شمس الدینی یمكه چاغرمینجه، بوده شیخ حقنده كی اسكی سؤ ظننك جزاسی اولدیغنی آكلامغله، كوپكلره یناشه رق، اونلرله یمكه باشلامش؛ شیخ بیرام بو حالی كورنجه، یاننه چاغروب، مریدلكه قبول ایتمش. آق شمس الدین بو ذاتك ارشاد ودلالتیله تصفیۀ درون ایده رك، سلوكده آز مدت ایچنده درجات عالیه یه واصل اولمش، وكمالات علمیه سی دخی اونسبتده اولدیغندن، وعلی الخصوص اجرای طبابتده كی مهارتی بركمال بولندیغندن، كسب اشتهار ایدوب، ادرنه یه عزیمتنده مظهر التفات حضرت پادشاهی اولمش؛ وحتی استانبول فتحنده دخی فاتحك معیتنده بولنه رق، پادشاه بونك نصایحندن وكمالات علمیه ومعنویه سندن استفاده ایله، او صره ده بعض كراماتی ظاهر اولمغله، وعلی الخصوص پادشاهك امریله حضرت ابی ایوب انصارینك مرقد شریفلرینی مكاشفه ایله بولوب، تعیین ایتمكله، پادشاهك محبتی ایكن قات اولوب، مریدلری صره سنه كیرمك وخلوت ایتمك استدعاسنده دخی بولنمشلرسه ده، شیخ حضرتلری پادشاهلره لازم اولان شی عدالتدر، خلوت سلطننه منافیدر دیه رك منع ایتمشلردی. فاتح حضرتلری حضرت ابی ایوب انصارینك مرقدمكشوفی جوارنده بنا ایتدكلری جامع شریفك جوارنده، شیخه مخصوص اولمق اوزره، زاویه لر تأسیس ایتمشلرسه ده، كندیسی طورمق ایستمیوب، وطن اتخاذ ایتمش اولدیغی (كوینك) یعنی طوربه لی قصبه سنه عودتله، وفاتلرینه

قدر اوراده وعبادتله وتشفیۀ مرضا ایله مشغول اولمشدر. ٨٦٤ تاریخنده ارتحل ایدوب، قصبۀ مذكوره ده دفن اولنمشدر. تربه سی الی یومنا هذا زیارتكاهدر. ١٢ اولادی اولوب، اك كوچكلری اولان (نور الهدی) مجزوب وابدال اولمغله، طرف پادشاهیدن نامنه وقفلر تعیین اولنمشیدی. حضرت شیخك تصوفه متعلق ((رسالة النور)) عنوانیله پك مقبول بر تألیفی، مطاعن صوفیه یه قارشی دیكر بررساله سی، وطبه متعلق مجرباتیله مصدق اولان ادویۀ نافعه یی مبین بر بر كتابی واردر.