Ahmed Paşa - احمد پاشا

(هرسك زاده _ ) اكابروزرای دولت علیه دن اولوب، سلطان بایزید خان ولی ویاوز‌ سلطان سلیم خان زمانلرنده درت دفعه صدراعظم اولمش، ومن حیث المجموع یدی سنه بو مسندی احراز ایتمشدر. عن اصل هر سكلی اولوب، عهد شبابنده شرف اسلامله مشرف اوله رق، ابو الفتح سلطان محمد ثانی‌ حضرتلرینك عتبه سه التجا و اختصاص ایتمشیدی. پادشاه مشارالیهك ارتحالنده آناطولی بكلر بكیسی ایدی. سلطان بایزیدك اواىٔل جلوسنده ظهوره كلن غواىٔلنده فوق العاده غیرت و خدمتی كورلدیكندن، مصاهرت شرفنه ناىٔل اولمشدی. ٩۰٩ تاریخنده مصر ملوك چراكسه سندن (قیتبای) ایله آچیلان محاربه ده سردار تعیین بیوریله رق، معیت و عونه سنه رحاوت طاری اولمغله، كمال غیرت و شجاعتندن بر فتۀ قلیله ایله بالذات میدانه آتیله رق، مجروح اولدقدن صكره، اسیر دوشمشیدی. ایرتسی سنه خلاص بولوب، درسعاته ورودنده مسند صدارىٔی احرازله، بر سنه بو مسنددده قالدقدن‌ صكره، عزل اولنه رق، قپودانلق عنوانیله موره ده كی اینه بختی فتحنه مأمور اولمشدر. او طرفلرده كمال موفقیتله بر نیجه قلاع و ممالی فتح ایتدكدن صكره، ٩۰٩ تاریخنده ثانیاً مسند صدارته ترفیع اولنه رق، اوچ سنه بو مقامی احراز ایتدكدن صكره، ٩١٢ تاریخنده عزل، و ینه قپودانلق مقامنه نصب اولنمشدر. ٩١٧ تاریخنده دفعۀ ثالثه اوله رق صداه‌ته كچمش ایسه ده، سلطان بایزید خانك اواخر سلطنتی دوری اولمغله، غواىٔل داخلیه ایله اغراشیله رق، دولتك قوتنه ضعف طاری اولمش اولدیغندن، بو دفعه بر كونه خدمته موفق اوله میوب، حركات عصیانیه یه جرآت ایتمش اولان یكیچریلر طرفندن قوماغی یغما اولنمش؛ و كندیسی اختفایه مجبور اولمشدی. ایرتسی سنه سلطان سلیم اول حضرتلری جلوس ایتمكله، صاحب ترجمه، دردنجی دفعه اولمق اوزره، مسند صدارت اعاده بیورلمش؛ و ایران سفرنده واقع اولان خدماتی پادشاهك تحسین و التفاتنه مظهریتنی موجب اولمش ایسه ده، بعده عسكر بیننده ظهور ایدن وضع كستاخانه دن طولایی بالاتهام، ٩٢۰ تاریخنده عزل

اولنمشدر. ٩٢٢ تاریخنده سلطان سلیم حضرتلری مصره عزیمتلرنده كندیسنی بروسه محافظلغنه تعیین بیورمش اولدقلرندن، بر مدت صكره اوراده وفات ایتمشدر.