Ahmed Paşa - احمد پاشا

(حافظ _ ) سلطان مراد خان رابع دورنده صدارت عظمایی احراز ایدن وزرادن اولوب، عن اصل فلبه یی بر مؤذنك اوغلیدر. سسی غایت كوزل اولوب، طبیعت شعریه سی ولطاىٔف و نكاتدن دخی بهره سی اولمغله، سرای همایونه داخل اوله رق، ندیم خاص غادشاهی اولمشیدی. مرورزمانله طوغانجی باشی اولدقدن صكره، رتبۀ وزارتله قپودان دریا و بعده شام والیسی اولوب،

وان، ارضروم و بغدادجه دخی بعض مأموریتلر ایفا ایتدكدن صكره، ١۰٣٤ تاریخنده دیاربكر والیلكندن مسند صدارته ترفیع اولنمغله، ایران شاهنك الینه كچمش اولان بغدادك استردادیچون ٩ آی چالیشمش ایسه ده، قحط وغلا و خسته لق كبی بعض موانعك دخی انضمامیله موفق اوله میوب، حلبه عودت ایتمكه مجبور اولمش؛ و ١۰٣٦ سنه سی صدارتدن عزل اولنه رق، دسعادته عودتنده، وزیر ثانی اولوب، مصاهرت شرفنه دخی ناىٔل اولمشدی. ١۰٤۰ تاریخنده ثانیاً صدر اعظم اولمش ایسه ده، آنجق یوز اون كون بومقامده قالدقدن صكره، قاىٔمقام رجب پاشانك افسادیله غلو ایتمش اولان اشرار طرفندن شهید اولمشدر. ادیب و شاعر و كریم بر ذات ایدی.