Ebul Ula' Muarra - ابو العلاء معری

(احمد بن عبدالله) اعاظم ادبا و شعرادن اولوب، ٣٦٣ تاریخنده سوریه ده حما قربنده واقع (معرة النعمان) قصبه سنده طوغمش؛ و یدی یاشنده ایكن، چیچك علتندن نور بصری فوت ایده رك، اعمی اولدیغی حالده، تحصیل علم و ادب ایتمش؛ و خارق العاده احوال غربیه دن اولمق اوزره، ادبیاتده عصرینك فریدی

اولمغله برابر، علوم و فنون ساىٔره یه دخی و قوف حاصل ایده رك، افكار و اقوال حكمایه مطلع اولمشیدی. و فرت ذكا وقوۀ حافظه سی حقنده پك چوق غراىٔب و نوادر منقولدر. پدرندن وساىٔر علمای عصرندن تحصیل ایتمش، و حماسه شارحی ابو زكریا خطیب تبریزی ایله ابو القاسم علی بن حسن تنوحی كبی مشاهیر ادبا جملۀ شاكردانندن بولنمشدر. ((لزوم مالایلزم)) عنوانیله ٥ جلد اوزره منظوم بر تألیفی و ((سقط الزند)) عنوانیله مشهور بر منتخبات اشعار مجموعه سی واردر، كه ((ضؤ السقط)) عنوانیله كندیسی شرح دخی ایتمش، و بو شرح مؤخراً دها بر درجه ایضاح و تفصیل اولنه رق، ((شرح التنویر علی سقط الزند)) تسمیه، و اخیراً (١٣۰٤ تاریخنده) مصرده طبع ب نشر اولنمشدر. متنبینك دیوان اشعارینه ((اللامع العزیزی)) عنوانیله بر شرح ترتیب، و ابو تمام، بحتری و متنبینك دیوانلرینی اختصار ایده رك، بو اوچ شاعرك اشعارینی موآخذه و تنقید دخی ایتمشدر. ((الایك و الغصون)) عنوانیله ادبیاته متعلق بر بیوك اثری دخی اولدیغی مروی ایسه ده، نسخه سی نایابدر. ایكی دفعه بغداده عزیمتله، برر مدت اقامت ایتدكدن صكره، و طننه عودتله، اختیار عزلت ایتمشیدی. اون بر یاشنده شعر سویلمكه باشلامشدی. قدمای حكمانك رأینه تابع اوله رق، حیوان اتی یمكی تجویز ایتمدیكندن، ٤٥ سنه آغزینه ات قومامشدر. افكار و اعتقادی حقنده بر چوق روایتلر واردر. ٤٤٩ تاریخنده وفات ایتمشدر. شو بر ایكی بیت جملۀ اشعار راىٔقه سندندر : ان كنت لم ترق الدماء زهادةً فلقد ارقت الیوم من جفنی دما سیرت ذكرك فی البلاد كانه مسك فسامعه تضمخ او فما واری الحجیج اذا ارادوا لیلة ذكواك اخوج فدیة من احرما