Ebu Osman Bin Leyyün - ابو عثمان بن ليون

(سعد بن ابی جعفر تجینی) اندلسك مشاهیر ادبا و شعراسندن اولوب، تصانیف كثیره صاحبیدر. اكثر اشعار و آثاری زهد و نصیحته متعلق اولوب، هندسه وفلاحته داىٔر دخی بعض تألیفاتی واردر. سكزنجی قرن هجری اواسطنده وفات ایتمشدر. تصنیفاتی یوزدن زیاده اولوب، اك معروفلری شونلردر: ((كمال الحافظ و جمال الافظ فی الحكم و الوصایا و المواعظ))، ((انداء الدیم فی الوصایا و المواعظ و الحكم))، ((الابیات المهذبة فی المعانی المقربة))، ((نصاىٔح الاحباب و صحاىٔح الآداب))، ((اختصار بهجة المجالس لابن عبدربه))، ((اختصار المرتبة العلیا لابن راشدالقفصی))، ن(( نفح السحر فی اختصار الروح الشحر لابن الجلاب الفهری))، بونلردن بشقه دها بر چوق

كتابلر اختصار ایتدیكندن، اختصار جیلقله شهرت بولوب، حتی اندلس اكابرندن بری پك اوزون بویلی بر آدم كوردیكنده ((ابن لیون بونی كورسه ایدی، اختصار ایدردی)) دیدیكی مشهوردر. اشعار حكیمانه سی چوق اولوب، شو قطعه او جمله دندر : لیس التفضل یا اخی ان تحسنا لاخ یجازی بالجمیل من الثنا ان التفضل ان تجازی من اسا لك بالجمیل و انت عنه فی غنی