Ebu Tahir Karmedi - ابو طاهر قرمطی

(سلیمان بن ابی سعید حسن) قرامطه طاىٔفه سنك رىٔیسی اولان سالف الترجمه ابو سعیدك اوغلی اولوب، ٣١١ تاریخنده، پدرینك وفاتی اوزرینه، ریاسته چكنجه، ١٧ یاشنده اولدیغی حالده، و فرت جسارت و شجاعتی حسبیله، بحریندن خروجله، بصره و كوفه یی و وادىٔ فراتك ساىٔر بر چوق یرلرینی ضبط، ودفعاتله حجاجی باصوب، اطرافی تهدید و تخریب، وراست كلنی قتل ایده رك، یكرمی سنه قدر مقام خلافتدن كوندریلن عسكرله اوغراشمش؛ و دفعاتله بغدادیٔ دخی تهدید ایده رك اهالیسنی قاچیرمش؛ و سنجار وموصله قدر توسیع داىٔرۀ تخریب ایتمش ایدی. ایكی دفعه مكۀ مكرمه یه دخی هجومله، شهری یغما ایتمش؛ و حجر اسودی مركزی اولان بحرینده كی (هجر) قصبه سنه نقل، و كعبۀ شریفه نك پوشیده سنی رفقاسنه تقسیم ایتمشیدی. افریقیه ده حكومت سورن مهدیٔ علوى كندیسنه بر مكتوب یازه رق، مكۀ مكرمه و كعبۀ شریفه حقنده بو كبی حركات باغیه ده، بولنمقدن منع، و حجر اسودك اعاده سنه دعوت ایتمش؛ وبر روایته كوره بونك تكلیفی اوزرینه، حجر اسودی اعاده ایدوب، بعده بتكرار غصبله، اللی بیك آلتون نه مقابل اهل اسلامه صاتمش؛ دیكر بر روایته كوره ده مهدینك تكلیفی اوزرینه ویرمیوب، بروجه مشروح صاتمشدر.

نهایت ٣٣٢ تاریخنده چیچك علننه اوغرایوب، تلف اولمغله، عبادالله ید ظلمندن قورتلمشدر.