Ebus Salt - ابو الصلت

(امیه بن عبدالعزیز) مشاهیر اطبا و حكمای اسلامدن اولوب، اندلسك (دانیه) قصبه سنده دنیایه كلمش؛ و اشبیلیه ده تحصیل ایتدكدن صكره، افریقیه یه هجرتله بر خیلی وقت مهدیه ده اقامت، و اورادن اسكندریه یه رحلت ایتمشیدی. طبده و علوم حكمیه و طبیعیه ده عصرینك فریدی اولدیغی كبی، علوم یریاضیه و هیىٔت و نجومده دخی ید طولى صاحبی ایدی. اسكندریه یه ورودنده، باقیرله مملو بركمی دكیزك درین بر محلنه تاتمش اولدیغندن، صاحب ترجمه بونی چیقارمغه

مقتدر اولدیغنی او وقت مصرك وزیری بولنان (افضل بن امیر الجیوس) ە عرض ایتمكله، ایستدیكی آلات وادوات اكمال اولندقدن صكره، بر طاقم مقره لرله كمی یی سطحی مایه قدر چیقاره بیلمش ایسه ده، ایپلرك قوپمسیله یكیدن یاتمشیدی. بونك اوزرینه وزیر مشارالیه حدتلنه رك، ابو الصلتی حبس ایله، روایته كوره یكرمی سنه یه قریب مدت محبسده طوتمشدر. روایته كوره صاحب ترجمه یه محبس اولمق اوزره بر كتبخانه اختیار اولندیغندن، ابو الصلت اوراده بولدیغی كتابلرك جمله سنی مطالعه ایده رك، معلومات علمیه ف فنیه سنی ده خیلی توسیع ایتمشدر. نهایت حبسدن قورتلنجه، مهدیه یه عودتله، ٥٢٩ تاریخنده اوراده وفات ایتمشدر. شعر و ادبیاتده دخی ید طولی صاحبی اولوب، كوزل اشعاری و فصیح رساىٔلی واردر. آثار معلومه سی بروجه آتیدر : مصرك احوال و آثاریله اوراده كوردیكی اطبا، حكما، منجمین، ادبا، شعرا وساىٔر مشاهیرك تراجم احوالنی جامع ((الرسالة المصریة))، ((اعضاء متشابهه ترتیبنجه مرتب (كتاب الادویة المفردة))، ((الانتصار لحنین بن اسحاق علی ابن رضوان فی تتبعه لمساىٔل حنین))، ((حدیقة الادب))، اندلس شعراسیله اورایه سیاحت ایندنلرك‌احوالنی جامع ((الملح العصریه))، ((رسالة فی الموسیقی))، ((كتاب فی الهندسة))، ((رسالة فی العمل بالاسطرلاب))، ((تقویم منطق الذهن))، ((دیوان الشعار)). موسقیده وعود چالمه ده دخی ماهر اولوب، افریقیه اغانیسنی جمع و تدوین ایتمشدر. شو بر ایكی بیت سنك مزارینه حكنی و صیت ایتمش اولدیغی بر قصیده سندندر : سكنتك یادار الفناء مصدقا بانی الی دار البقاء اصیر و اعظم مافی الامر انی صاىٔر الی عادل فی الحكم لیس یجور فیالیت شعری كیف القاه عندها وزادی قلیل و الذنوب كثیر