Ebu Talib Bin Abdülmüttalib - ابو طالب بن عبدالمطلب

(عبد مناف) فخر كاىٔنات (صلم) افندمزك عمی و حضرت علی (رضه) ك پدریدر. نبی ذیشانك پدری جدینك حیاتنده وفات ایتمش اولدیغندن، بیوك پدری عبدالمطلب وفاتنده كندیلرینی اوغلی ابو طالبك وصیتنه براقمشیدی. ابو طالبك فخر مرسلین افندمزه محبت و شفقتی فوق العاده اولدیغی كبی، حضرت پیغمبرك دخی صاحب ترجمه یه و فرت محبتلری وار ایدی. ابو طالب شامه واقع اولان سفرنده حضرت نبی یی دخی برابر آلمشیدی. فخر كاىٔنات افندمز اظهار دعوت بیوردقلرنده، ابو طالب هیچ بروقت تكذیب یولنه كیتمیوب، اسلامك دین حق اولدیغنی تصدیق، و حضرت پیغمبری قریشك تعرضات و تصدیانندن هر وجهله محافظه و مدافعه ده زیاده سیله

جهد و غیرت ایتمش ایسه ده، اختیارلغنده آبا واجدادینك دیننی ترك بر عار زعم ایده رك، اسلامه كلمه مشیدی. حضرت رسول الله (صلعم) ابو طالنك اسلامه كلمسنی زیاده سیله آرزو بیوروب، ولو صوك نفسنده شهادت كتیرمسنی تكلیفدن خالی قالمازلردیسه ده، بروجهله راضی اوله مامشدی. نهایت روحنی تسلیم ایدركن، دوداقلرینی تحریك ایتدیكی كوریلوب، یاننده بولنان برادری حضرت عباس طرفندن كلمۀ شهادتی تلفظ ایتدیكی رسالتپناه افندمزه تبشیره اولنمغله، ((الحمدلله الذی هداك یاعم)) بیوردقلری مرویدر. آنجق بو روایت متفق علیه اولمیوب، ابو طالبك ایمانی مسىٔله سی مختلف فیه قالمشدر. هر حالده فخر كاىٔنات افندمزه ودین اسلامه اولان خدمتلری غیر منكردر. نبوتدن ١۰ سنه صكره و هجوتدن اوچ سنه اول، سكسان یاشنی متجاوز اولدیغی حالده، وفات ایتمشدر. طالب، جعفر، علی و عقیل اسملریله درت اوغلی وام هانی فاخته و جمانه اسملریله ایكی قیزی اولوب، بونلردن یالكز طالب كندیسندن اول وفات ایتمشدر.